काँग्रेसीचें ईडी कचेरे भायर आंदाेलन

भांगरभूंय | प्रतिनिधी

राहुल, सोनिया गांधी हांचे आड आरोपपत्र दाखल करपाचो निशेध

पणजीः नॅशनल हेराल्ड प्रकरणांत राहुल गांधी आनी सोनिया गांधी हांचे आड आरोपपत्र दाखल करपाच्या कृतीचो निशेध करपा खातीर काँग्रेसीचें पणजे ईडी कचेरे भायर आंदोलन केलें. जे देशांत ज्वलंत मुद्दे आसात त्या मुद्यांचेर विरोधकांचो आवाज चेपून उडोवपा खातीर सरकार ईडीचो वापर करता, असो आरोप काँग्रेसीच्या फुडाऱ्यांनी केलो.

काँग्रेसीच्या पदाधिकाऱ्यांनी पणजे पाट्यार ईडीचे कचेरे मेरेन मोर्चा व्हेलो. पूण पुलिसांनी इमारतीची गेट बंद दवरून रस्त्या भायर तांका आडयले आनी भितर सरपाक दिले ना. उपरांत काँग्रेसीच्या फुडाऱ्यांनी गेटी भायर बसून सरकाराचो निशेध करप चालूच दवरलें. ह्या वेळार गोंय काँग्रेस प्रदेशाध्यक्ष अमीत पाटकार, विरोधी पक्ष फुडारी युरी आलेमांव, हळदोणेंचे आमदार कार्लुस फेरेरा आनी हेर काँग्रेसीच्या संघटणांचे फुडारी हाजीर आशिल्ले.

ह्या वेळार उलयतना अमीत पाटकार हांणी सांगलें, स्वातंत्र लढ्या वेळार देशा खातीर आवाज काडपा खातीर पंडीत जवाहरलाल नेहरू हांणी हेर फुडाऱ्यां सयत असोसीयेटेड जनर्लस लिमिटेडाची (एजेएल) स्थापना करून नॅशनल हेराल्ड उजवाडाक हाडलें.

उपरांत एजेएलाचेर रिणाचें वजें वाडत गेलें आनी व्हीआरएस, पीए, कर आनी लायटीची बिलां ही थकीत रक्कम भरपा खातीर 100 बँक ट्रान्जेक्शना वरवीं 90 कोटी मेरेन काँग्रेस पक्षान दिल्ले. एजेएलचे कामकाज जाग्यार हाडपा खातीर यंग इंडीयनाची स्थापना जाली आनी ह्या रिणाचें इक्विटीत रुपांतरण केलें. हें सगलें कायदेशीर प्रक्रियेक पाळो दीत सरकारच्या साच्यांत जालें.

यंग इंडीयन ही कंपनी कायद्याच्या कलम 25 खाला बिगर नफो संस्था आसा आनी ते कसलेच लाव आपल्या भागधारकांक जशे की पक्षाचे फुडारी सोनिया गांधी, राहुल गांधी दिवपाक शकनात. यंग इंडीयन एजेएल हांकां ताब्यात घेवंक ना. सगली मालमत्ता आनी येणावळ एजेएल हांचे कडेच उरता आनी कसलोच वांटो यंग इंडीयन कडेन वचना. ते भायर एजेएल कडेन 5 हजार कोटीची मालमत्ता आसा हें चुकीचें. आयकर खात्यान घेतिल्ल्या नियाळा प्रमाण एजेएल हांची मालमत्ता रु. 359 कोटी इतलीच दाखयल्या, असो दावो पाटकार हांणी केलो.

आयज देशांत बेरोजगारी, म्हारगाय, महिलांचेर अत्याचार, बलात्कार आनी खुना सारकिल्ले मुखेल मुद्दे आसात ते चेपून उडोवपाक लागून काँग्रेस पक्षाच्या फुडाऱ्यांचेर फटीच्यो केसी घालप आनी ईडीक मुखार हाडून षडयंत्र करून विरोधकांचो आवाज चेपून उडोवपाचो यत्न चल्ला असो आरोप पाटकार हांणी केलो.

विरोधकांचो आवाज बंद करपा खातीर देशभर यत्न चल्ल्यात आनी फटीच्यो केसी घालून ईडी कडल्यान समन्स धाडून तडजोड करून तांकां भाजपात घेतात, असो आरोप विरोधी पक्ष फुडारी युरी आलेमांव हांणी केलो.

रातयां भितर तांका वॉशिंग मशिनांत धुतात आनी पवित्र करतात. संविधानांत आशिल्ल्या अधिकारांचो दुरूपेग करून भाजपाचे फुडारी राजकी यंत्रण बदलतात हें पळोवन आयज दुख्ख जाता. कायदो हो देशा खातीर ना फक्त भाजपाच्या मनशा खातीर आसा. देशभर चलिल्ले भ्रश्टाचार आनी बेरोजगारिच्या विशयांचे सरकाराक कांयच पडूंक ना. जेन्ना लोकांचे मोग एकठांय करपा खातीर राहुल गांधी कन्याकुमारी ते कश्मीर मेरेन भारत जोडो यात्रा घेवन भोवलो तेन्ना हें तांकां दुखलें आनी तांचो आवाज बंद करपाचो यत्न केलो, असो आरोप युरी आलेमांव हांणी केलो.