भांगरभूंय | प्रतिनिधी
एकाच दिसा मेळ्ळे 108 कोवीड दुयेंती
पणजी : देशाच्या हेर वाठारांं सयत गोंंयांंत लेगीत कोविडाचो धोको दिसांन दीस वाडत आसा. रामनमीच्या दिसा बिरेस्तारा एका कावीड दुयेंतींंक मरण आयलें. 168 दीस म्हणल्यार 5 म्हयन्यांं उपरांत राज्यांत कोवीड दुयेंतीक मरण आयलें. हाचे पयलीं 13 ऑक्टोबर 2022 ह्या दिसा कावीड दुयेंतींंक मरण आयिल्लें. हाचे उपरांंत बिरेस्तारा कोवीड दुयेंतींक मरण आयलांं.
तशेंच बिरेस्तारा 959 चांंचण्यां उपरांंत 108 दुयेंती मेळ्ळे. फाटल्या चार म्हयन्यांत एकाच दिसा 100 परस चड दुयेंती मेळूंक नासले. कोरोना सक्रीय दुयेंतींचो आंकडो 453चेर पावला. बिरेस्तारा 7 दुयेंतींंक उपचारा खातीर हॉस्पिटलांत दाखल केले, जाल्यार 3 दुयेंतींक डिस्चार्ज दिलो. घरा आयझोलेशनांत 101 दुयेंती आसात. एका दुयेंतींक मरण आयिल्ल्यान कोरोना बळींचो आंकडो 4014चेर पावला.
दक्षीण गोंंय जिल्हो हॉस्पिटलांत एका मनशाक मरण आयले उपरांत हाडलो. ताची कोवीड चांंचणी पॉझिटिव्ह आयली. ह्या दुयेंतीक हेर गंभीर दुयेंसां बी आशिल्लीं ताची म्हायती मेळूंक ना, अशें भलायकी खात्याचे एपिडोर्मिलोजिस्ट डॉ. प्रशांत हांंणी सांंगलें. कोवीड बळी म्हूण ही नोंद जाल्या.
फाटल्या वर्सा सावन कोरोना दुयेंतीं मेळपाचे प्रमाण उणें जालां. तशेंच राज्यांतल्या 90 टक्के परस चड लोकांनी वासिनां घेतल्यांत. हाका लागून सगले वेवहार सुरळीत जाले. कोविडचे कसलेच निर्बंध आतां नात. मार्च म्हयन्यांत देशा सयत गोंंयांंत कोवीड दुयेंती मेळपाक लागले.
पयलीं दिसाक 15 मेळटाले, उपरांत ते 25 जाले, उपरांंत 40 जाले. बिरेस्तारा 108 दुयेंती मेळ्ळे. फाटल्या सप्तकांंत सक्रीय कोवीड दुयेंतींंचो आंंकडो 100 आशिल्लो, तो आतां 453वेर पावला. हाचो अर्थ जे गतीन नवे दुयेंती मेळटात, ते गतीन ते बरे जायनात. राज्यांत सगल्या भलायकी केंद्रांंनी कोवीड दुयेंतीं मेळपाक लागल्यात.
आतां फक्त गोंंय वैजकी म्हाविद्यालय हॉस्पिटलांत कोवीड दुयेंतींचेर उपचार जातात. कोविडा खातीर स्वतंंत्र वॉर्ड गोमॅकॉंत सुरू जाला. ह्या वॉर्डांत उपचार घेवपी दुयेंतींचो आंकडो वाडत आसा. जोर आयलो वा भलायकी इबाडली जाल्यार दर एकल्यान कोरोनाची चांंचणी करची. चांंचणी पॉझिटिव्ह आयल्यार उपचार सुरू करचे असो सल्लो दोतोरांनी दिला. तशेंच मास्क घालपा सयत सॅनिटायजराचो वापर करप योग्य थारतलें अशें दोतोरांंनी सांगलां. वासिनाचे डोस नाशिल्ल्या कारणान वासिनीकरण मोहीम बरोच तेप बंद आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
