भांगरभूंय | प्रतिनिधी
पिस्तुलान घात मारिल्ल्यान टोकियो ऑलिम्पिकांतल्यान पडिल्लें भायर
पॅरीस : पॅरीस ऑलिम्पिकांत कांश्या पदक जिखपी मनू भाकर हिका टोकियो ऑलिम्पिकांत बायलांच्या 10 मीटर एअर पिस्तूल सर्तीचे फायनलींत सुवात मेळूंक शकली ना. पात्रताय फेरये वेळार तिचें पिस्तूल बिघडलें. निमाण्या खिणाक पिस्तूलांत बिघाड जाल्ल्यान तिका पात्रताय फेरयेंतल्यान भायर सरचें पडलें. तेवेळार तिका पांच मिनटां पिस्तुल सारकें जाता कांय ना तें पळोवंक वाट पळोवची पडिल्ली.
मनून पात्रताय फेरयेंत 98 गूण मेळयल्ले. दुसरे फेरयेंत तिचें पिस्तुल पेड्ड्यार जालें. तेवेळार तिणें लक्ष्य सोडलें आनी सुमार पांच मिनटां उपरांत तिचें पिस्तुल फिक्स जालें. मात, पिस्तुल पेड्ड्यार जाल्ल्यान सुरवातीचे नेम चुकिल्ले, ते लुकसाण जावन फायनलींत पावपाक ताका दोन गूण उणें पडलें. पिस्तुलान घात मारिल्ल्यान मनू खूब रडलें. ते उपरांत तें कांय काळ डिप्रेशनांत गेल्लें. तातुंतल्यान भायर सरतना ताणें नव्यान सुरवात केली.
रोखडीच ताणें लिमांत जाल्ली 10 मीटर एअर पिस्तूलांत बायलांची ज्युनियर संवसारीक सर्त जिखली. उपरांत ज्युनियर सर्किटांत नेमान पदकां जिखलीं. मनू भाकरान 2022 वर्सा कायरो संवसारीक वस्तादपण सर्तींत बायलांच्या 25 मीटर पिस्तूलांत रुप्यां पदक आनी 2023 वर्सा हांग्झू हांगा जाल्ले आशियाई खेळां सर्तींत भांगरा पदक जिखलें. ते उपरांत मनून चांगवोनांत जाल्ले आशियाई नेमबाजी वस्तादपण सर्तींत बायलांच्या 25 मीटर पिस्तूल प्रकारांत पांचवे सुवातेर रावन पॅरिस 2024 ऑलिंपिक कोटा निश्चीत केलो. आनी आतां ऑलिम्पिक पदक जिखून ताणें इतिहास रचलो.
पिस्तुलाचो परवानो
मेळटा म्हणसर नाकापुरो
ऑलिम्पिकांत नेमबाजींत भारताक पयलें पदक जिखपी मनू भाकराक पिस्तुलाचो परवानो मेळोवपा खातीर अडेज म्हयने वाट पळोवची पडली हें खूब कमी जाणांक खबर आसा.
हेर खेळगड्यांक सादारणपणान एका सप्तका भितर परवानो मेळटा.
परवानो मेळोवपाचे प्रक्रियेची याद करून मनूचे बापूय राम किशन भाकर हांणी सांगलें, ”मे 2017 त हांवें विदेशांतल्यान पिस्तूल घेवपा खातीर अर्ज केल्लो. पूण म्हजो अर्ज झज्जर जिल्हो प्रशासनान न्हयकारिल्लो.”
उपरांत हें प्रकरण प्रसार माध्यमांनी उखलून धरलें तेन्ना पिस्तुला खातीर परवानगी घेवपाक ‘आत्मसंरक्षण’ हें कारण दिल्ल्याचें दिसून आयलें. ते उपरांत जिल्हो प्रशासनान ह्या प्रकरणाची चवकशी करून सात दिसां भितर मनू भाकर हांकां परवानो मेळोवन दिलो.
बॉक्सिंग, अॅथलेटिक्स, स्केटिंग, ज्युडो आनी कराटे ह्या मळांचेर तिणें नशीब आजयिल्ल्यान मनूचे शाळेंतले इश्ट तिका ‘ऑलराऊंडर’ म्हणटात.
मनून पयलेच फावट ताच्या शाळेंत आयोजीत केल्ले नेमबाजी सर्तींत वांटो घेतिल्लो आनी तिणें लक्ष्य इतलें अचूकपणान सादलें की ताच्या शाळेंतल्या शिक्षकांकूय अजाप जालें अशें मनूच्या बापायन सांगलें.
अदीक प्रशिक्षण घेतले उपरांत वेगवेगळ्या सुवातींनी जावपी सर्तींनी तिणें वांटो घेवपाक सुरवात केली. पूण समस्या अशी आशिल्ली की मनूक परवानाधारक पिस्तुल घेवन भौशीक बशींतल्यान प्रवास करूंक मेळनाशिल्लें. तशेंच तें ल्हान आशिल्ल्यान तिका सर्तींक वतना गाडीय व्हरपाक मेळनाशिल्ली म्हूण राम किशन भाकर हांणी आपले चलयेचीं सपनां पुराय करपा खातीर नोकरी सोडली. नोकरी सोडल्या उपरांत ते मनूवांगडा नेमबाजी सर्तींक वचूंक लागले.
तांणी सांगलें, ”नेमबाजी हो खूब म्हारग खेळ. दरेक पिस्तुलाचें मोल दरेकी 2 लाख रुपया आसा. आतां मेरेन आमी मनू खातीर तीन पिस्तुलां विकतीं घेतल्यांत. एका वर्सांत आमी ताच्या सरावाचेर 10 लाख रुपया खर्च करतात.”
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
