भांगरभूंय | प्रतिनिधी
लोकांनी भायर सरून जमीन रुपांतरणां आड विरोध सुरू करचो
पणजीः कलम 39 (अ) विरोधांत रेव्ह्युलेशनरी गोवन्स पक्षाचे आमदार विरेश बोरकार हांणी आक्रमक भुमिका जाहीर केल्या. 39 (अ) रिव्होल्ट हे नवे चळवळी खाला आंदोलन सुरू करून 39 (अ) विरोधांत गांवांगांवांनी बंड करपाचें थारयलां. 39 (अ) रिव्हॉल्ट हांकां लोकांनी भायर सरून आपल्या गांवांत जमीन रुपांतरणां आड विरोध सुरू करचो, असो उलो आमदार विरेश बोरकार हांणी मारलो.
18 जूनाक क्रांती दिसा निमतान आमदार विरेश बोरकार हांच्या फुडारपणा खाला गोंय वाटावपा खातीर पणजे रॅलीचें आयोजन केल्लें. पणजे कदंब बस स्टॅण्डार सुरू जाल्ली ही रॅली आझाद मैदानार येवन सोंपली. हे रॅलीक शेंकड्यांनी गोंयकार हजर आशिल्ले. ह्या वेळार 39 (अ) रिव्हॉल्ट चळवळ बोरकार हांणी जाहीर केली.
सरकारान गांव वाटावपा खातीर कायदे हाडचे. गांव सोंपोवपा खातीर न्हय. पूण सराकार आयज 17 (2), 39 (अ) च्या नांवान गोंय काबार करपाचे कायदे हाडल्यात, असो आरोप बोरकार हांणी केलो.
खूबशे सुटके झुजारी आनी क्रांतिवीर गोंया खातीर झुजले आनी 18 जून दीस क्रांतीच्या इतिहासांत कोरलो. ज्या तेंपार हो क्रांतीचो आवाज उठयिल्लो तो अजूनय आमकां उठोवचो पडटा. आझाद मैदानार आमचें आंदोलन जाल्लें तेन्ना 39 अ सरकार भायर मारतलें अशें आश्वासन दिल्लें. पूण तें सरकारान स्थगीत करून फक्त सांत आंद्रें मतदारसंघा पुरतेंच मर्यादीत दवरलें. सरकार आनी मुख्यमंत्र्यांनी केल्ले फटींगपणाक लागून आयज काळजा सावन दुख्ख दिसता, अशें बोरकार हांणी म्हणलें.
तशेंच विधानसभेंत हो 39 (अ) चो प्रस्न घेवपाचें आश्वासन मुख्यमंत्र्यांनी दिल्लें. पूण पोटवेंचणुकेचें कारण फुडें काडून विधानसभा अधिवेशन तहकूब केलें. तशेंच जेन्ना मुख्यमंत्र्यांच्या मतदारसंघांत 39 (अ) आयलें तेन्ना तांणी एक दिसा भितर स्थगीत केलें. आपल्या मतदारसंघांत जर मुख्यमंत्री 39 (अ) रद्द करपाक शकता जाल्यार हेर मतदारसंघांनी कित्याक ना, असो प्रस्न बोरकार हांणी केलो.
हो लढो 39 (अ) आनी नगर नियोजन मंत्री विश्वजीत राणे हांचे आड आसा. हो जो लढो गोंयकारांचो आसा आनी ह्या लढ्याक तेंको दिवपाक सगल्या गोंयकारांनी उबे रावया. ज्या गांवांनी 39 (अ)च्या नांवान चोरी चल्ल्या गांव काबार करपाक, उदक आटोवपाक, सैम-जनावारां काबार करपाक ताचे आड आमचो लढो फुडे वचून 39 (अ) रिव्हॉल्ट ही चळवळ गांवांगांवांनी व्हरतले, अशें बोरकार हांणी जाहीर केलें.
दिल्लीची बिल्डर लोबी गोंयांत येवन आमच्या भुरग्यांचें आनी फुडले पिळगेचें अस्तित्व काबार करपाक उठल्या. जर आमी गोंयकार भुरग्यांक लागून उठनात जाल्यार गोंय फुडाराक उरपाचें ना. ज्या ज्या गांवांनी 39 (अ) आयलां त्या गांवच्या लोकांनी ग्रामसभेंत वचून विरोध करचो पडटलो, खात्यांनी वचून आक्षेप मांडचे पडटले आनी चड जालें जाल्यार भायर सरचें पडटलें, असो उलो बोरकार हांणी मारलाे.
आमी एक सोपूत घेवपाक जाय. 39 (अ) विरोधांत घरा कणकणीं वचून लोकांक सांगचें पडटलें. लोकांनी आपल्या गांवचो फुडार थारावचो आनी 39 (अ) खंय जालां जाल्यार आमकां संपर्क करचो. आमी रोखडेच आमचो फोन क्रमांक आनी इमेल जारी करतले ताचेर तुमी आमकां संपर्क करपाक शकतले, अशें बोरकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
