भांगरभूंय | प्रतिनिधी
पणजी: रान खात्यान 37.667 हॅक्टर क्षेत्र सुवात राखीव रानक्षेत्र म्हूण घोशीत केल्या. हातूंत फोंडें म्हालांत गांजे 8.500 हॅक्टर आनी केपें म्हालांतल्या बाळ्ळी हांगासरले 37.165 हॅक्टर सुवातेचो आस्पाव आसा. रान खात्याचे सचीव नेथन आरावजो हांणी हे विशीं अधिसुचोवणी जारी केल्या.
गांजे हांगासरले सुवाते विशीं रान हक्क वा हेर दावे आसल्यार ताची चवकशी उत्तर गोंय सेटलमेंट रान अधिकारी करतले. ही सुवात काम्पा रान कायद्यान राखीव घोशीत केल्या. गांज्या सर्व्हे क्रमांक 12/2 (पार्ट) हे सुवातेर झाडांची सैमीक आच्छादन आशिल्ल्याचें अधिसुचोवणेंत म्हणलां.
बाळ्ळेची सुवात राखीव घोशीत करचे पयलीं सरकारान 2010 वर्सा हे विशीं कांय आक्षेप, रान हक्क आसल्यार तें खात्याक कळोवपाक सांगिल्लें. पूण हे विशीं थारायिल्ले मुजतींत कसलोच आक्षेप वा रान हक्क दावे येवंक नाशिल्ल्यान हे क्षेत्रूय राखीव रानक्षेत्र म्हूण जाहीर केलां. हाका लागून हे सुवातेर हेर कोणाचेंय कसलेच अधिकार उरूंक नाशिल्ल्याचें स्पश्ट केलां.
बाळ्ळेची सुवात सर्व्हे क्रमांक 56 (पी) मदली आसा. ही सुवात देंवतेर आसून थंय कॉम्पेनसेटरी रानीकरणांतल्यान लायिल्ल्या झाडांच्यो विवीध प्रजाती आसात. हे सुवातेत कसलीच मनीस वस्ती, घरा, पोशिल्लीं जनावरां, धर्मीक थळां, कृशी क्षेत्र, पियेवपाच्या उदकाची सुवात, फळ झाडां बी नाशिल्ल्याचें स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
