भांगरभूंय | प्रतिनिधी
भांगरभूंय । प्रतिनिधी
फोंडेंः हालींच गोंयांत जाल्ल्या 37व्या राष्ट्रीय खेळां सर्तींत पदकां मेळयल्ल्या अनुसूचीत जमातींतल्या (एसटी) खेळगड्यांचो खेळां मंत्री गोविंद गावडे हाचे हस्तुकीं भोवमान केलो. फोंडें हांगां युनायटेड ट्रायबल्स असोसिएशन अलायन्स (उटा) हांणी बिरसा मुंडा जंयती कार्यावळींत व्हो भोवमान केलो. ह्या वेळार आदलो आमदार वासुदेव मेंग गांवकार, उटाचो अध्यक्ष प्रकाश वेळीप, दुर्गादास गावडे, जिल्हो पंचायत वांगडी शुभना वेळीप, नारायण कामत, विश्वास गावडे आनी रोमाल्डो गोन्साल्वीस हाजीर आशिल्ले.
ह्या वेळार नेहा गांवकार, प्रतीक्षा वेळीप, योगिता वेळीप, सूरज वेळीप, चंद्रहास वेळीप, दर्शन वेळीप, बाबू गांवकार, प्रज्योत सोलयेकार, नारायण गावडे, उत्तेज गावडे, संतोष गांवकार, नितेश जल्मी ह्या पदकां मेळयल्ल्या खेळगड्यांचो भोवमान केलो. राष्ट्रीय सर्त येशस्वी केल्ले खातीत खेळां मंत्री गोविंद गावडे हाचो प्रकाश वेळीप हाचे हस्तुकीं भोवमान केलो.
एसटी समाजांतल्या खेळगड्यांनी राष्ट्रीय खेळां सर्तींत बरी कामगिरी करून दाखयली. अशी कामगिरी करून सरकाराक आपली दखल घेवपाक लावप हेच दरेका खेळगड्याचें खरें येस आसा अशें गावडे हाणे सांगलें. राष्ट्रीय सर्तींत गोंयच्या खेळगड्यांनी बरें प्रदर्शन करून लोकांची मनां जिखली. उटा संघटना खेळगड्यांच्या आनी समाजाचे उन्नती खातीर वावुरता. संघर्शांतल्यान फुडाराक बरें फळ मेळटलें अशें ताणे फुडें सांगलें. प्रकाश वेळीप आनी वासुदेव गांवकारान आपले विचार मांडले. दुर्गादास गावडेन येवकार दिलो आनी विश्वास गावडेन निमाणे उपकार मानले. डॉ उदय गांवकारान कार्यावळीचें सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
