भांगरभूंय | प्रतिनिधी
येरादारी पुलिसांनी एका कदंब चालकाकूय धरलो
म्हापशें: सोरो पियेवन गाडी चलोवलप्यां आड येरादारी पुलिसांनी सोमारा सांजवेळा केल्ले विशेश मोहिमे खाला 35 जड वाहन चालकां आड गुन्यांव नोंद केलो. हातूंत एका कदंब बस चालकाचोय आस्पाव आसा.
फाटल्या शेनवारा 13 वेर कान्सा, थिये ट्रकान धपको दिल्ल्यान दुचाकी चालक सुजाता सूर्यकांत साळगांवकार (26, जयदेववाडो, नास्नोळें) हे तरणाटेक मरण आयिल्लें. ह्या अपघाताक कारण थारिल्लो दुबावीत ट्रक चालक प्रमोद गांवस (रा. मानशी वाळपय) हो घडणुके वेळार सोऱ्याचे घुंवळेंत वाहन चलयतालो आनी दुचाकीचे दिशेन वचून ईव्ही दुचाकीक धपको दिल्ल्यान ते तरणाटेक मरण आयिल्लें. धपको दिले उपरांत दुबावितान घडणूक थळा वेल्यान धांव मारिल्ली आनी नानोड्यां दिवचले सावन ताका कोलवाळ पुलिसांनी धरलो आनी अटक केल्ली.
हे घडणुकेचे फाटभुंयेर येरादारी पुलीस विभागान पुलीस अधिक्षक राहूल गुप्ता हांच्या मार्गदर्शना खाला सोमारा 15 वेर सांजवेळच्या सत्रांत सोरो पियेवन वाहन चलोवप्यां आड गोंयभर विशेश मोहीम राबयली. चड करून हे मोहिमेंत ट्रका सारक्या अवजड वाहनांक येरादारी पुलिसांनी लक्ष्य केल्लें.
ते प्रमाण ह्या अर्दवेळ सत्राच्या मोहिमे वेळार पुलिसांनी 35 वाहन चालक सोऱ्याचे घुंवळेंत वाहन चलयतना सांपडले. हातूंत एका कदंब बस चालका सयत ह्या सगल्या वाहन चालकांचेर वाहन येरादारी कायद्या प्रमाण गुन्यांव नोंद केला. तशेंच संबीदीत वाहनां जप्त केल्यांत.
मजगतीं, ह्या दुबावीत सोरो पियेल्ल्या वाहन चालकांक येरादारी पुलिसांनी संबीदीत पयलो वर्ग न्यायालयांत हजर करतात. न्यायालया कडल्यान दुबावितांक दंडात्मक आनी सादे बंदखणीची ख्यास्त दितात. तशेंच दुबावितांचो वाहन चालक परवानो येरादारी खात्या कडल्यान निलंबीत करपाची शिफारस न्यायालया कडल्यान निवाडो दितना करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
