भांगरभूंय | प्रतिनिधी
सुमार 2,500 जाणांक मेळटलो रोजगारः उद्देगमंत्री
भांगरभूंय I प्रतिनिधी
पणजी : राज्य गुंतवणूक उत्तेजन मंडळाची (आयपीबी) बसका जावन 310 कोटींच्या 6 प्रकल्पांक मान्यताय दिल्या. ह्या 6 प्रकल्पांतल्यान 2,500 जाणांक रोजगार उपलब्ध जातलो, अशी म्हायती उद्देग मंत्री मॉवीन गुदिन्हो हांणी दिली. हे बसकेक मुख्यमंत्री डॉ. प्रमोद सावंत हाजीर आशिल्ले. 6 प्रकल्पांक मान्यताय दिवपा सयत लॉजिस्टीक धोरणाचेर बसकेंत चर्चा जाली.
गोंयांत लॉजिस्टीक उद्देगांक बरो फुडार आसा. हातूंतल्यान मोट्या प्रमाणांत रोजगार निर्माण जातले. लॉजिस्टीक धोरणाच्या कार्यवाहीचेर बसकेंत चर्चा जाली. एक, दोन प्रस्ताव वगळ्ळ्यार हेर सगल्या प्रस्तावांक मान्यताय दिल्ल्याचे मुख्यमंत्र्यान सांगलें.
राज्यांत गुंतवणूक करपाक उद्देजक इत्सूक आसात. उद्देगां खातीर फावो त्या प्रमाणांत मुळाव्यो सुविधा उपलब्ध करून दिवपाची गरज आसा. प्रदुशण मुक्त उद्देग हाडपाचे सरकाराचे यत्न आसात, अशें मंत्री मॉवीन गुदिन्हो हांणी सांगलें.
आयपीबी बसकेंत 310 कोटींच्या 6 प्रकल्पांक मान्यताय दिल्या. हातूंतल्यान 2,500 जाणांक रोजगार उपलब्ध जावप शक्य आसा. पेडण्यां खाजगी जमनींत अॅमुजमेंट पार्क प्रकल्पाक मान्यताय दिल्या. अॅमुजमेंट पार्का सयत मोपा विमानतळा लागसार ‘थीम पार्क’ प्रकल्प जातलो. हे दोनूय प्रकल्प प्रदुशण विरयत आसात.
दर्यांत नुस्ते पोसपी ‘मदर ओशियन’ प्रकल्पाक मान्यताय दिल्या. हो विदेशी संकल्पनेचेर आदारीत प्रकल्प आसा. थळाव्या नुस्तेमाऱ्यांक ह्या प्रकल्पाचो लाव जातलो. हेर कन्स्ट्रक्शन ह्या हॉटमिक्स प्रकल्पाक मान्यताय दिल्या.
‘ब्लू मॉक’ ह्या बँडाचो डिस्टीलरी प्रकल्प सुरू जातलो. 50 कोटीं वयर गुंतवणूक आशिल्लो हो व्हड प्रकल्प आसा. विजेचे मोटर्स तयार करपी ‘कराट’ प्रकल्पाक मान्यताय दिल्या. तशेंच हरवळ्यां ‘पॅकींग इंडस्ट्री’क आयपीबीचे बसकेंत मान्यताय दिल्या. ह्या पॅकींग उद्येगांत तरेकवार प्रकाराचीं पॅकिंगां जातलीं, अशें मंत्री गुदिन्हो हांणी सांगलें.
गोंयांत गुंतवणूक करपी प्रकल्पांतल्यान विवीध वस्तूंचे उत्पादन तयार जावन ताची संवसारभरांत निर्यात करतले. मोपांतल्या मनोहर आंतरराष्ट्रीय विमानतळाक निर्यातीक वाव मेळटलो. ते खातीर कांय प्रकल्प पेडणें वाठारांत येतले, अशें उद्देग मंत्र्यान सांगलें.
मजगतीं, गोंयांत नितळ, नवे तंत्रज्ञान आत्मसात केल्ले तशेंच प्रदुशण विरयत प्रकल्प हाडपाचे यत्न राज्य सरकारान चलयल्यात. तेच फाटभुंयेर ह्या स प्रकल्पांक मान्यताय दिल्या. हातूंतल्यान व्हड प्रमाणांत रोजगार निर्माण जावन थळाव्या तरणाट्यांक रोजगाराच्यो संदी मेळटल्यो, अशें मंत्री गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
