भांगरभूंय | प्रतिनिधी
पणजी ः गुजरातचो एक तरणाटो मोगान पडिल्लो तो दीस मनोवपा खातीर आपले इश्टिणीक मेळपाक खास गोंयांत आयिल्लो. तो दीस तांच्या त्या खास दिसाचें तिसरें वर्स आशिल्लें. ते रातीं पार्टी करुन मध्यान रातीं 1:30 वरांचेर रेंट अ कारींतल्यान माशेलांतल्यान पणजे वटेन तीं वतालीं. पूण ती रात तांचे खातीर एक भिरांकूळ रात आसतलीं हें तांणी सपनांत लेगीत चिंतूक नाशिल्लें. ते भायर ते रातीं घडिल्ल्या घडणुकेक लागून हजारांनी प्रस्न निर्माण जाले आनी सगळ्या खातीर ते एक कुवाडे जावन उरल्यात. जाची जाप आजून मेळ्ळी ना.
https://www.facebook.com/bhaangarbhui/videos/8307283096021990
बाशुदेव हो गुजरातचो तरणाटो जाल्यार ताची इश्टीण सांखळे मॅनेजमेंट कॉलेजींत शिकता. शेनवार ३१ ऑगस्टाचे मध्यान रातीं 1:30 वरांचे सुमाराक बाशुदेव आनी ताची इश्टीण माशेलांतल्यान पणजे वताली. तिचो हो इश्ट बाशुदेव भंडारी तीन-चार दिसां आदीं गुजरातांतल्यान तिका मेळपाक गोंयांत आयिल्लो. शेनवारा दोगांय रेंट ए कार घेवन हणजुणा वचपाक भायर सरली. माशेलांत तांचे गाडयेन निळ्या रंगाचे एके गाडयेक धपको दिलो. उपरांत तांच्या मदीं बाचाबाची जाली. उपरांत ते निळे गाडयेन तांचो फाटलाव केलो. हाका लागून दोगांय भियेलीं. आनी ते निळे गाडये पसून वाटावपाच्या यत्नांत बाशुदेवान आपल्याक शक्य आसा थंयच्यान वाट काडपाचो यत्न केलो. वाट काडीत काडीत ती आखाडो- सांतइस्तेव फेरी धक्याचेर पावली. पणजे सावन कांय अंतराचेर आशिल्ल्या सांतइस्तेव नांवाच्या जुंव्यार फेरी धक्क्यार काळखांत रस्त्याचो अदमास येवंक नाशिल्ल्यान वेगान वचपी ही गाडी सरळ न्हंयेंत गेली. उपरांत उदक गाडयेत भितर सरपाक लागलें. दोगांयनी गाडयेचे दार उगडून भायर येवन आपलो जीव वाटावपाचो यत्न केलो. पेंवपाक येताले ताका लागून बाशुदेवाची इश्टीण सुरक्षीत देगेर आयली. बाशुदेवाक पेंवपाक येनाशिल्लें. तो देगेर पावलोच ना. काळखांत फाटल्यान तो खंय गायब जालो हे इश्टणीक लेगीत कळ्ळें ना. ते उपरांत ते इश्टणीन लागसारच्या एका घरांत वचून सगळो प्रकार सांगलो. उपरांत पुलीस, उजो पालोवपी दळ आनी हेर बचाव पंगड घडणुक थळार पावले. पोरण्या गोंयच्या पुलिसांनी चवकशी केली तेन्ना पेंवून देगेर आयिल्ले इश्टणीन पुराय घडणूक पुलिसांक सांगली.
चार दीस न्हंयेचे देगेर सोद घेतलो, पूण बाशुदेव मेळ्ळो ना. उपरांत पुलिसांनी ताका मेल्लो अशें मानलें. पूण बाशुदेवाचो बापूय आनी भाव हांणी पुलिसांच्या चवकशेचेर नाराजी उक्तायली. मजगतीं, बाशुदेवाच्या बापायन सांगलें, बाशुदेवच्या मोबायलार 4 सप्टेंबराक कॉल केलो तेन्ना 4 सेकंद तशेंच 35 सेकंदा खातीर कोणें तरी फोन उखलिल्लो. ते भायर ही घडणूक घडले उपरांत बाशुदेवची इश्टीण चलत लागसारच्या घरांत मजत घेवपा खातीर गेल्ली हें सीसीटीव्ही फुटेजींत दिसता. ते प्रमाण बाशुदेवच्या भावान त्या घरांतल्या लोकां कडल्यान म्हायती घेवपाचो यत्न केलो तेन्ना तांणी दिल्ले म्हायती प्रमाण, एक चली रातची आयिल्ली आनी तिणें तिचो अपघात जाल्ल्याचें सांगिल्लें. पूण घरांतल्या एका वांगड्याच्या मोबायला वयल्यान तिणें आपले आवयक फोन केलो आनी इश्टाचो नंबर मेळयलो आनी ताचे कडेन ती बरोच वेळ उलयली. इतलें सगळें जावनूय बाशुदेवाक वाटावपा खातीर ह्या घरांतल्या लोकांची मजत कित्याक घेवंक ना? असो प्रस्न बाशुदेवच्या भावान केलो. हाका लागून हे विशीं बाशुदेवचे इश्टीणीचेर दुबाव उक्तायलो.
ते उपरांत पुलिसांनी बाशुदेव जिवो आसा असो अदमास धरुन परतून म्हयनोभर सगळ्या वटांनी चवकशी केली. पूण, हाताक कांयच लागलें ना.
घडणुकेक कांय दीस जाले तरी बाशुदेव भंडारीचो कांयच पत्तो नाशिल्लो. ते खातीर बाशुदेव उदकांत आसूंक जाय अशें समजून न्हंयेच्या तळाक आनी लागसारच्या दर्यांत कितेंय मेळटा काय तें पळोवपा खातीर काल 30 सप्टेंबर सावन ताचो सोद परतून सुरू केलो. नौदळाच्या पाणबुड्यां सयत ताचो घेतलो. तशेंच काल पुलीस ड्रोनाच्या मजतीनूय ताचो सोद घेताले. ते भायर काल पोरणे गोंय पुलिसांनी परतून दर्यादेग राखण आनी उजो पालोवपी दळ तशेंच कोस्टल पुलिसांच्या पंगडाक आपोवन न्हंयेची तपासणी केली. तरी लेगीन आजून बाशुदेव भंडारी मेळ्ळो ना.
हे घडणुकेक लागून जायते प्रस्न निर्माण जाल्यात. बाशुदेव भंडारी गेलो तरी खंय? कांय ताका उदकांत बुडून मरण आयलें. ताका पेंवपाक येतालें? मरण आयलें जाल्यार ताची कुड अजून कित्याक सांपडून ना? ह्या सगळ्यां प्रस्नांची जाप आनी हें कुवाडे सोडोवपाचें आव्हान आतां पोरणें गोंय पुलिसां मुखार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
