भांगरभूंय | प्रतिनिधी
पणजीः गोंय सरकारान ३०० युनीट लायट फुकट दिवन आदली फुगोवन आयिल्लीं बिलां माफ करचीं. तशेंच २४ वरां लायटीची पुरवण सुनिश्चीत करची. आम आदमी पक्ष हे बाबतींत मुख्यमंत्र्यांक सहकार्य करपाक तयार आसा. आमी सरकाराक ३१ जुलय मेरेनची मुजत दितात आनी जर ह्यो मागण्यो पुराय जावंकना जाल्यार जनआंदोलन जातलें, अशी शिटकांवणी आम आदमी पक्षाचे राष्ट्रीय समन्वयक अरविंद केजरीवाल हांणी दिल्या.
दोनापावला आपान आपयल्ले पत्रकार परिशदेंत केजरीवाल उलयताले. ह्या वेळार दिल्लीची आदली मुख्यमंत्री आतिशी मारलेना, बाणावलेचे आमदार वेन्झी व्हिएगस, आपचे गोंय अध्यक्ष वाल्मिकी नायक आनी हेर फुडारी हजर आशिल्ले.
सद्या गोंयांत लायट धड ना पूण बिलां येतात देखून लोक फुर्योज जाल्यात. तांचे स्वताचे मंत्री दिगंबर कामत हांणी फुगोवन आयिल्ल्या बिलाचे विशय घेवन सांगलां, एक कूड आशिल्ल्या घरांक ३ हजार ते ५ हजार मेरेन बिलां आयल्यांत, अशें केजरीवाल हांणी म्हणलें.
वाडीव बिलां येवपा फाटल्यान खूब कारणां आसात. कांय जाणांक चुकीचीं बिलां आयल्यांत आनी तीं सारकीं करपात तांकां व्हाणो झरोवच्यो पडटात. कांय जाणांक दंड पडटा, कांय जाणांचो लोड वाडला अशीं १०० कारणां आसात. हीं बिलां भरपाची गोंयकारांची औकाद ना आनी दंडाचेर पडिल्लें जुर दर म्हयने वाडत आसा देखून लोक चिंतेंत आसात, असो आरोप केजरीवाल हांणी केलो.
तशेंच गोंयांत व्हडा प्रमाणांत लायटीचो आपालिपा चलता. गोंय सरकारान विधानसभेंत मांडिल्ल्या डेटा प्रमाण गोंयांत जानेवारी २०२४ ते माय २०२५ हे १६ म्हयन्याच्या काळांत १९ हजार खेपे लायट गायब जाल्या. फाटल्या तीन म्हयन्यांत दर दिसा हजारांनी लायट गायब जाल्या. गोंय हें लायट गायब जावपाचें राज्य जालां, असो थोमणो केजरीवाल हांणी मारलो.
देखून आमी सरकाराकडेन स्पश्ट तीन मागण्यो दवरतात. पयली मागणी दिल्ली आनी पंजाब भशेन ३०० युनीट मेरेन लायट फुकट दिवची. गोंयचो अर्थसंकल्प ३० हजार कोटींचो आसा. ३०० युनीट फुकट दिल्यार फक्त ३०० कोटी इतलो भार सरकाराचेर येतलो आनी फकत १ टक्के बजेटाचो वापर हे येवजणेचेर जातलो, असो युक्तिवाद केजरीवाल हांणी केला.
तशेंच १५ जून मेरेन जितलीं लोकांचीं बिलां थकल्यांत तीं सगळीं घरगुती बिलां सरकारान माफ करचीं. दिल्ली आनी पंजाब ह्या दोनूय राज्यांत थकिल्लीं सगळीं बिलां माफ जाल्यांत आनी हें करप शक्य आसा. मुख्यमंत्र्यान आमकां आमंत्रण दिवचें, आमी तांकां हे बाबतींत मजत करपाक तयार आसात, असो सल्लो केजरीवाल हांणी दिलो.
तशेंच गोंयकारांक २४ वरां लायट दिवची. गोंयांत लायटीचो उणाव ना फकत वेवस्थापनांत खूब त्रुटी आसात. दिल्ली आमी २४ वरां सेगीत लायटीची पुरवण करून दाखयल्या. ३ वर्सां मेहनत घेतले उपरांत दिल्ली आतां एकूय फावटी लायट वचना. जर ह्यो तिनूय मागण्यो पुराय जाल्यो जाल्यार गोंयच्या ७६ टक्के लोकांक हाचो फायदो जातलो, असो उलो केजरीवाल हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
