भांगरभूंय | प्रतिनिधी
बँकेची किचकट प्रक्रिया; लॉकरांत सांपडिल्ल्यो काळाभायऱ्यो नोटी
म्हापशें: पयशे परतून मेळोवपा खातीर बँकेची लांबचे लांब प्रक्रिया आनी तातूंत खर नेम, अटींक लागून बार्देसांतल्या मरण आयिल्ल्या व्यक्तीच्या भुरग्यांनी लॉकरांतल्या 3 कोटी रुपयांचेर उदक सोडलें. जाल्यार ही रक्कम आमच्या बँकेच्या लॉकरांत न्हय जाल्यार एका राष्ट्रीयकृत बँकेच्या लॉकरांत सांपडिल्ल्याचो दावो सदर बँकेच्या चॅरमनान करून ह्या प्रकरणाचेर पड्डो उडोवपाचो यत्न केलो.
‘भांगरभूंय’न दोन दिसां पयलीं हे संबंदी खबर उजवाडा हाडिल्ली. ह्यो नोटी काळाभायऱ्यो जाल्ल्यान ह्या कुंटुंबाचे सुमार तीन कोटी रुपयांचें लुकसाण जालें. ही खबर वाचून खूबशा लोकांनी त्या भुरग्यांक मजत करपा खातीर आपखोशी दाखयिल्लरी. पूण त्या मयत व्यक्तीची तिनूय भुरगीं सुशिक्षीत आनी विदेशांत बर्या हुद्यार कामाक आसात.
आवय-बापायच्या नांवांन आशिल्लें आनी बँक अधिकाऱ्या म्हऱ्यांत लॉकर 6 मे दिसा उक्ते केले उपरांत तांकां पोरण्यो आनी काळाभायऱ्यो जाल्ल्या नोटींचीं बंडलां सांपडिल्लीं. तीन लॉकरांत ही 3 कोटी रुपयांची रोख रक्कम आशिल्ली. ही रक्कम पळोवन सगले जाण अजापीत जाले. ही सहकारी बँक गोंयांतली नामनेची आसा.
बँकेच्या लॉकरांत ह्या काळाभायऱ्या जाल्ल्या नोटींची रक्कम सांपडिल्ली. ताका लागून ही रक्कम ग्राह धरप अपेक्षीत आशिल्ली. बँक अधिकाऱ्यांनी लेगीत ह्या लॉकरधारकाच्या तिनूय भुरग्यांक रक्कम परतून मेळटली अशी आस्त दाखयली. पूण हे खातीर लागपी भारतीय रिझर्व्ह बँकेची लांबचे लांब प्रक्रिया आयकून ते निरशेले.
ही प्रक्रिया केले उपरांत उण्यांत उणे अडेज ते तीन वर्सांनी वट्ट रकमे पैकीं अर्दी म्हणल्यार 50 टक्के (देड कोटी) रक्कम मेळटली अशें अधिकाऱ्यांचें म्हणणें आशिल्लें. पूण हीं तिनूय भुरगीं गिरेसत आसून तीं विदेशांत स्थायीक आशिल्ल्यान इतलो काळ पयशे मेळपाची वाट पळयत बसप तांकां शक्य नाशिल्लें. ताका लागून तांणी बँकेची ही प्रक्रिया करप शक्य नाशिल्लें. पयलींच हें लॉकर उक्तें करून पळोवपा खातीर तांकां कांय बँक प्रक्रियांक सामकार वच्चें पडिल्लें. हाका लागून तांणी पयशे मेळपा खातीरची ही प्रक्रिया करपाक स्वारस दाखयलो ना. लॉकरांत आशिल्ले आवय-बापायचें भांगर घेवन ते गेले.
बँक लॉकरांत सांपडिल्ले हे रकमे विशीं ‘भांगरभूंय’न सदर सहकारी बँकेच्या चेरमना कडेन संपर्क सादलो. तेन्ना हें लॉकर आमचे बँकेंतलें नासून राष्ट्रीयकृत बँकेंतलें आशिल्ल्याचें सांगून तांणी ह्या प्रकरणाचेर पड्डो उडोवपाचो यत्न केलो.
एखादे बँकेंत पांच-स वर्सां लॉकर वा खात्याची सदर गिरायक लावार्थ्यां कडल्यान वापर वा वेव्हार केलो ना, जाल्यार संबंदीत गिरायकाक पुर्वसुचोवणी दितात. जर तांणी प्रतिसाद दिलो ना वा तांचो पत्तो लागलो ना जाल्यार बँकेच्या नेमा प्रमाण प्रक्रिया जाले उपरांत लॉकर उक्तें करपाचो अधिकार बँकेक आसा. पूण हांगा 12 वर्सां लॉकरा कडेन बँकेन आडनदर केल्ल्याचें स्पश्ट जायत आसा, आनी हाका लागून इतले व्हड सांठोवन दवरिल्ले रकमेचें रुपांतर मात कागादांत जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
