भांगरभूंय | प्रतिनिधी
1 जानेवारी ते 31 डिसेंबर 2023 काळांतली आंकडेवारी
पणजी: गोंयांत 1 जानेवारी ते 31 डिसेंबर 2023 ह्या काळांत जाल्ल्या 2,846 अपघातांनी वट्ट 290 जाणांक मरण आयलें. हातूंत 72.06 टक्के म्हणल्यार 209 मरण हे दुचाकी चालक वा ताचे फाटल्यान बशिल्ल्यांक आयलां. ह्या 209 जाणा पैकीं 65.55 टक्के म्हणल्यार 137 जाणांनी हॅल्मेटाचो वापर करूंक नाशिल्लो. ताका लागून तांचो अपघातांत बळी गेल्ल्याची धक्को दिवपी म्हायती मुखार आयल्या.
केंद्रीय भूपृष्ठ येरादारी मंत्रालय देशांतल्या सगल्या राज्यां कडल्यान वर्सुकीं अपघातांची आंकडेवारी मागयता. उपरांत त्या आंकडेवारीचो अहवाल तयार करून दरेक राज्यांतले अपघात आनी मरणाचो अहवाल जाहीर करतात. राज्यांतल्यान येरादारी खात्यान धाडिल्ल्या अहवाला प्रमाण वयली म्हायती मुखार आयल्या.
राज्यांत 2023 वर्सा 2,846 अपघातांनी 290 जाणांक अपघाती मरण आयलां. तातूंत 209 दुचाकी चालक आनी फाटल्यान बशिल्ल्यांक मरण आयिल्लें. तातूंतल्या 104 दुचाकी चालकांनी जाल्यार 33 दुचाकीचे फाटल्यान बशिल्ल्यांनी हॅल्मेट घालूंक नाशिल्ल्यान तांकां मरण आयलां. जाल्यार 72 जाणांनी हॅल्मेट घाल्लें. पूण तांकां हेर कारणांक लागून मरण आयिल्लें. तशेंच 2023 वर्सा 88 दुचाकी चालक गंभीर, जाल्यार 263 हॅल्मेट घालूंक नाशिल्ल्यान किरकोळ जखमी जाल्ले. दुचाकी फाटल्यान बशिल्ल्यां मदीं 85 गंभीर, जाल्यार 177 जाण हॅल्मेट घालूंक नाशिल्ल्यान किरकोळ जखमी जाल्ले.
मजगतीं, राज्यांतल्या फाटल्या पांच वर्सांचे आंकडे पळयत जाल्यार, 1,307 जाणांक अपघाती मरण आयिल्लें. तातूंतले 70,54 टक्के म्हणल्यार 922 दुचाकी चालक आनी फाटल्यान बशिल्ल्यांक मरण आयिल्लें. हातूंत 479 दुचाकी चालक आनी 142 फाटल्यान बशिल्ले मेळून 67.35 टक्के म्हणल्यार 621 जाणांनी हॅल्मेट घालूंक नाशिल्ल्यान मरण आयिल्लें. जाल्यार 32.65 टक्के म्हणल्यार 301 जाणांनी हॅल्मेट घाल्लें.
हॅल्मेट घालूंक नाशिल्ल्यांक मरण
वर्स — वट्ट मरण — वट्ट दुचाकीस्वार — दुचाकी चालक — फाटल्यान बशिल्ले
2019 — 297 — 213 — 117 — 30
2020 — 223 — 168 — 92 — 25
2021 — 226 — 152 — 85 — 24
2022 — 271 — 180 — 81 — 30
2023 — 290 — 209 — 104 — 33
वट्ट — 1,307 — 922 — 479 — 142
——————-
हेल्मेट घाल्ल्यांक मरण
वर्स………दुचाकी चालक
2019 — 66
2020 — 51
2021 — 43
2022 — 69
वट्ट — 301
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
