भांगरभूंय | प्रतिनिधी
पणजी ः आपल्या पदाचो गैरवापर करुन लाखांनी रुपयांची अफरातफर केल्ल्या प्रकरणांत मानसोपचार आनी मानवी वर्तणूक संस्थेंतलो (IPHB) वरिश्ठ सरकारी लिपिकाचेर गुन्यांव नोंद करुन ताका निलंबित केला. मेळिल्ले म्हायती प्रमाण तांणे आपल्या फाटल्या 5 वर्सांत आयपीएचबीच्या कर्मचाऱ्यांच्या पगारांतल्यान सुमार 24 लाख रुपया आपल्या खात्यात घाले.
वयल्या विभागाचो लिपिक म्हणून काम करपी दुबाविताक दोन दिसां आदीं अंतर्गत चवकशी उपरांत निलंबीत केलो. मेळिल्ले म्हायती प्रमाण एका कर्मचाऱ्यान आपल्या पगारांतल्यान रीण आनी विमो प्रीमियम कपात हांचे मदीं फरक आशिल्ल्याचो हुस्को उक्तायल्या उपरांत ही फटवणूक उजावाडाक आयली. हाका लागून अंतर्गत चवकशी सुरु जाली आनी तातूंत कपात केल्लो निधी लिपिकाच्या वैयक्तीक खात्यांत घातिल्ल्याचे दिसून आयलें.
आयपीएचबीच्या अधिकाऱ्यांनी पणजे उपअधीक्षका कडेन औपचारीक कागाळ करून आरोपीं आड एफआयआर दाखल करपाची मागणी केल्या. खात्यान दिल्ले म्हायती प्रमाण कर्मचाऱ्यांचे रिण आनी विमो खात्यांत निधी वितरीत करपाची जापसालदारकी लिपिकाचेर आशिल्ली. हाचो फायदो घेवन दुबावितान कर्मचाऱ्यांच्या रिणाची सेवा आनी विमो प्रीमियम खातीर निधी भारतीय स्टेट बँकेंतल्या आपल्या वैयक्तीक खात्यांत वळोवन घुस्पागोंदळ केलो. मजगतीं फाटल्या पांच वर्सां सावन हो प्रकार चालू आशिल्लो. कोणाकच कसलोच दुबाव येवचो न्हय म्हणून दर म्हयन्याक वेगवेगळीं रक्कम कपात करप चालू आशिल्ले. कर्मचाऱ्यांनी रिणाच्या फारीकणींतल्या विसंगती विशीं प्रस्न विचारले तेन्ना उल्लेख केल्ल्या लिपिकांन तांकां हो प्रस्न मांडचो न्हय असो सल्लो दिलो.
आयपीएचबीच्या एका वरिश्ठ अधिकाऱ्याच्या म्हणण्या प्रमाण, ह्या प्रकरणाची पुराय चवकशी करपा खातीर आनी संबंदीत हेर लोकांची वळख करपा खातीर खाशेलो पंगड नेमपाची मागणी अर्थ खात्याकडेन केल्या.
सध्या दुबावीत लिपिकाचे पगार आनी वैयक्तीक बँक खातींय गोठयल्यांत. ताणें एकल्यानूच अशें केलें आसलें तरी हेर व्यक्तींचो हातूंत आस्पाव आशिल्ल्याचो अधिकाऱ्यांक दुबाव आसा. फुडले पुलीस तपासांतल्यान हेर जायत्यो गजाली स्पश्ट जातल्यो. म्हत्वाचें म्हणल्यार ह्या प्रकारांक लागून मध्यम आनी उण्या पगाराच्या वर्गांतल्या कर्मचाऱ्यांक फटको बसला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
