भांगरभूंय | प्रतिनिधी
सुदिन ढवळीकार: रिइन्वेस्ट 2024 परिशदेंत वीज मंत्र्यांनी घेतलो वांटो
पणजी: गोंयांत 2030 मेरेन पुराय वीज अक्षय उर्जेतल्यान निर्माण करपाचें उद्दिश्ट आसा. हाचे खातीर 2030 मेरेन राज्यांत 2200 मेगावॉट अक्षय उर्जा तयार जावपाक जाय, अशें राज्याचे वीज मंत्री सुदिन ढवळीकार हांणी सांगलें. गांधीनगर (गुजरात) हांगा रिइन्वेस्ट 2024 संवसारीक परिशदेंत ते उलयताले.
प्रधानमंत्री नरेंद्र मोदी हांणी सोमारा रिइन्वेस्ट 2024 परिशदेचें उक्तावण केल्लें. मुख्यमंत्री डॉ. प्रमोद सावंत हांणी परिशदेंत सोमारा उलोवप केल्लें. हाचे उपरांत मंगळारा वीज मंत्री सुदिन ढवळीकार हांचें भाशण जालें.
2030 मेरेन पुराय वीज अक्षय उर्जेतल्यान तयार जावपा खातीर सौर उर्जा 1900 मेगावॉट, वार्या सावन तयार जावपी वीज 570 मेगावॉट जाल्यार बायोमास वीज 220 मेगावॉट तयार जावपाक जाय. इतली वीज तयार जाली जाल्यार गरजे इतली 2200 मेगावॉट वीज तयार जावप शक्य आसा.
गोंय हें ल्हान राज्य आसा. 33 टक्के रान वाठार आनी 66 टक्के हरीत वाठार आसा. हाका लागून वीज निर्मितीक मर्यादा येता. सोलर रुफटॉप माध्यमांतल्यान 1900 मेगावॉट वीज निर्मिती करपाचो प्रस्ताव आसा. रुफटॉप सोलर वीज निर्मिती खातीर 50 टक्के अनुदान दिवपी येवजण आसा. ते भायर प्रधानमंत्री सूर्यघर येवजणेची कार्यवाही सुरू जाल्या. हे येवजणेंतल्यान एका वर्सांत 100 मेगावॉट वीज निर्मिती करपाचें उद्दिश्ट आसा.
गोंय हे सैमीक नदरेन गिरेस्त राज्य आसा. हांगा वर्साचे खूबशे म्हयने वत आसता. सरकारी इमारतींचेर रूफटॉप पॅनल बसोवन 30 मेगावॉट वीज निर्मितीचें उद्दिश्ट आसा. धरणाचेर फ्लोटींग पॅनल बसोवन 198 मेगावॉट जाल्यार कालव्यांचेर पॅनल बसोवन 170 मेगावॉट वीज निर्मिती करपाचें उद्दिश्ट आसा.
वार्याच्या माध्यमांतल्यान 100 मेगावॉट वीज तयार करपा खातीर निविदा जारी जाल्या. तशेंच विजेचो योग्य प्रमाणांत वापर जावपा खातीर तंत्रज्ञानांत बदल करपाचो प्रस्ताव आसा. ग्रीन हायड्रोजन, इंटीग्रेटेड पीव्ही तंत्रज्ञानाचो अवलंब जातलो.
हरीत उर्जेक उर्बा दितना मुळाव्या सुविधांचो विस्तार जायत आसा. उद्देजक तशेच गुंतवणुकदारांनी गोंयांत गुंतवणूक करची. गुंतवणुकी खातीर गोंय हे आदर्श राज्य आसा, अशें वीज मंत्री सुदिन ढवळीकार हांणी परिशदेंत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
