भांगरभूंय | प्रतिनिधी
म्हापशें: आमी पदा खातीर न्हय जाल्यार पक्षा खातीर काम करतात. पक्ष कार्य हीच आमची मोख आसा. वेंचणुकेंत पिरायेचो मुद्दो येना. 2029चे लोकसभे वेळार उत्तर गोंयांतल्यान कोणेय इत्सा उक्तायत जाल्यार भाजपान तरणाट्या चेऱ्याक संद दिवची. तशी हांव जाहीर सुचोवणी पक्षाक करतां, अशें सांगून आपली ही निमाणी वेंचणूक आशिल्ल्याचें अप्रत्यक्षपणान केंद्रीय मंत्री तशेंच उत्तर गोंयचे भाजपा उमेदवार श्रीपाद नायक हांणी सांगलें.
मंगळारा म्हापश्यां पक्षाच्या उत्तर गोंय कचेरेंत विकसीत भारत ह्या संकल्प यात्रा अभियाना वेळार आयोजीत पत्रकार परिशदेंत ते उलयताले. ह्या वेळार प्रदेशाध्यक्ष आनी राज्यसभेचे खासदार सदानंद शेट तानावडे, उपसभापती ज्योशुआ डिसोझा, नगराध्यक्षा डॉ. नूतन बिचोलकर, आमदार मायकल लोबो, आमदार केदार नायक, आदले आमदार दयानंद सोपटे, ग्लेन टिकलो, दत्ता खोलकार, महानंद अस्नोडकार हाजीर आशिल्ले.
पक्षान दिल्ली जबाबदारी पुराय करपाची एकूच मोख घेवनूच भाजपा कार्यकर्ते काम करीत आसतात. ताका लागून तिकेट मेळटली काय ना हो मुद्दो नासता. तिकेटीचो विशय हो पुरायपणान विचार करूनच घेतात. विकसीत भारत हें एकूच मिशन भाजपा कार्यकर्त्यांचें आसा. ताका लागून सत्तेंत आसूं वा नासूं पक्षाचे कार्य करीत रावतलों अशें श्रीपाद नायक हांणी म्हणलें.
प्रदेशाध्यक्ष सदानंद शेट तानावडे हांणी म्हणलें, लोकसभा आनी राज्यांच्या विधानसभा वेंचणुकांनी बायलांक 33 टक्के आरक्षण मंजूर जालां. ताची अंमलबजावणी अजून जावंक नासली तरी बायलां कार्यकर्त्यांक संद मेळची होच प्रामाणीक उद्देश पक्षाचो आसा. ते प्रमाण केंद्रान एक बायल उमेदवार गोंयच्यान आसची अशी सुचोवणी केल्या. हाचेर पक्ष निमाणो निर्णय घेतलो. आमी आमचे प्रतिस्पर्धी कोण आसात हाचेर विचार करिनात. आमचे लक्ष जैत मेळोवपा कडेन आसता. गोंयच्यो दोनूय सुवातो आमीच जिखतले असो ठाम आत्मविस्वास तानावडे हांणी उक्तायलो.
येता ते लोकसभे खातीर भाजपाचो वचननामो (जाहीरनामो) उजवाडायतले. दिल्लीं आस्वासनां शंबर टक्के पुराय केल्यांत. ह्या वचननाम्यांत लोकांची मतां आसचीं, हेच फाटभुंयेर सगल्या थरांतल्या लोकां कडल्यान सुचोवणी मागयल्यात. जेणे करून लोकाभिमूख वचननामो तयार करपाक मजत जातली. गोंयच्यान उण्यांत उणें 50 हजार लोकांच्यो सुचोवण्यो मेळोवपाचे आमचे उद्दिश्ट आसा. हे खातीर सगली कडेन संकल्प यात्रा रथ भोंवडायतात अशें तानावडे हांणी म्हणलें.
रिव्होल्युशनरी गोवन्स हो काल-पयरचो आयिल्लो पक्ष. फाटल्या 25 वर्सांत कितें घडलां हें आरजीवाल्यांक दिसचें ना अशा उतरांनी श्रीपाद नायक हांणी आरजीचे टिकेक जाप दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
