भांगरभूंय | प्रतिनिधी
भाजपा प्रदेश कार्यकारिणी समितीच्या कार्यकर्त्यांक मंत्र
येवजण्यो, भाजपाचीं कामां लोकां मेरेन पावोवपाचो सल्लो
सरकाराच्या स म्हयन्यांच्या कामांचो अहवाल सादर
भांगरभूंय । प्रतिनिधी
पणजी : शेनवारा पणजे जाल्ले भाजपा प्रदेश कार्यकारिणी समितीच्या कार्यकर्त्यांक मार्गदर्शन केलें. ह्या वेळार 2027 वर्साच्या गोंय विधानसभा वेंचणुकेंत 30 सुवातो मेळोवपा खातीर कार्यकर्त्यांक ‘चला, उठात, तयार जायात’ हो मंत्र दिल्ल्याची म्हायती प्रदेशाध्यक्ष दामू नायक हांणी दिली. बसके उपरांत जाल्ले पत्रकार परिशदेंत ते उलयताले. ह्या वेळार केंद्रीय मंत्री श्रीपाद नायक, खासदार सदानंद शेट तानावडे आनी हेर पदाधिकारी हाजीर आशिल्ले. हाचे आदीं बसकेंत केंद्रीय मंत्री एल मुरुगन आनी मुख्यमंत्री डॉ. प्रमोद सावंत हांणी बसकेंत हाजीर आशिल्ल्यांक मार्गदर्शन केलें.
दामू नायक हांणी सांगलें, 209 वांगड्यांतले 197 वांगडी बसकेक हाजीर आशिल्ले. एकठांय येवन 30 सुवातो जिखपाचो सल्लो बसकेंत दिलो. हे खातीर मंडळ आनी बूथ पांवड्यार पदाधिकाऱ्यांक जापसालदारकी दिल्या. केंद्र आनी राज्य सरकारान लोकांच्या फायद्या खातीर जायत्यो येवजण्यो सुरू केल्यात. ह्यो येवजण्यो आनी भाजपा सरकारान केल्लीं कामां लोकां मेरेन पावपाचो सल्लो ह्या वेळार दिलो. सर्वानंद भगत हांणी स म्हयन्यांचो कामाचो अहवाल सादर केलो. तशेंच फुडाराक हातांत घेवपा आशिल्ल्या उपक्रमांची म्हायती दिली.
प्रधानमंत्री नरेंद्र मोदी हांणी हालींच बारा वर्सांचो कार्यकाळ पुराय केला. ते देशांतले सगल्यांत चड काळ आशिल्ले प्रधानमंत्री थारले. तांच्या काळांत जाल्ल्या देशाचे उदरगती विशीं म्हायती ह्या वेळार दिली. नरेंद्र मोदी हांकां परबीं दिवपी थाराव ह्या वेळार मंजूर जालो. प्रधानमंत्र्यांची ‘मन की बात’ कार्यावळ आयकुपाक, तातूंतलो आशय लोकां मेरेन पावोवप आनी कार्यावळीची म्हायती लोकां मेरेन पावोवपाक कार्यकर्त्यांक सांगलें. बसकेंत आदले मंत्री रवी नायक, यशवंत कांदोळकार आनी परेश नायक हांकां आर्गां ओपलीं. बूथांचेर वचून सरकाराच्यो येवजण्यो लोकां मेरेन पावोवपाचें उलो मुख्यमंत्र्यान मारला, अशें दामू नायक हांणी सांगलें.
अँटी इनकमबन्सी ना : एल मुरुगन
गोंयचे उदरगतीचो आराखडो, केंद्रीय येवजण्यो लोकां मेरेन पावोवपाचो आनी संघटना घटमूट करपाचो सल्लो दिलो. गोंयांत अँटी इन्कमबन्सी आसा अशें म्हणटात. पूण तशें ना अशें तांणी सांगलें. गुजरात तशेंच हेर राज्यांनी लेगीत भाजप सरकारां सत्तेर आयल्यात अशें केंद्रीय मंत्री एल मुरुगन हांणी सांगलें.
‘सगल्या मतदारसंघांनी पक्ष संघटना घटमूट करतले’
गोंयांतल्या सगल्या चाळिसूय विधानसभा मतदारसंघांत पक्ष संघटना घटमूट करपाचेर आमचो भर आसतलो. केंद्रीय नेतृत्व युती विशीं योग्य वेळार योग्य निर्णय घेतलें. गोंयांतल्या एका विशिश्ट समाजांत पक्षा विशींचो चुकीचो समज निर्माण करून दितात. अश्या लोकां मदीं लेगीत भाजपाची बरीं कामां पावोवपाचो सल्लो कार्यकर्त्यांक दिला, अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
