2023 वर्सा रानांक उजो लागपाच्यो 102 घडणुको

भांगरभूंय | प्रतिनिधी

रानां खात्याची विधानसभेंत म्हायती

2022 ते मे 2024 मरेन गोंयभर 116 रानांक उजो लागपाच्यो घडणुको

पणजीः 2023 वर्सा सगल्यांत चड रानांक उजो लागपाच्यो घडणुको घडल्यो. ह्या एकाच वर्सा वट्ट 102 घडणुको घडल्यात. धांरबादोंडें म्हालांतलीं चडशीं रानां लासून गेल्यांत, अशी म्हायती रानां खात्यान दिवन रानांक उजो लागचो न्हय हे खातीर जतनाय लेगीत घेतल्या अशें सांगलां.

2022 ते 2024 मेरेन रानांक उजो लागपाचे घडणुके विंशी रानां खात्यान विधानसभेंत म्हायती दिली. मार्च 2022 ते मे 2024 मरेन गोंयभर 116 रानांक उजो लागपाच्यो घडणुको घडल्याे.

खात्याचो अणभव आनी निरिक्षणा प्रमाण गोंयांत रानां लासपाचो हंगाम चडसो जानेवारींत सुरू जावन पावस पडचे पयली साेंपता. ह्या उज्या फाटल्यान सैमीक आनी मनीस निर्मीत हीं दोन कारणां आसात. उच्च तापमाना सयत सुकें वातावरण, पर्यावरणांत उणी आद्रता आनी वसंत रुतूंत पावसाची गैरहाजेरी हीं सैमीक कारणां आसात.

शेतकार शेतांनी, भाटांनी आनी काजी नितळ करून थंय उजो घालतात आनी वाऱ्या बरोबर तो मुखार वचून रानांक तेंकता. तशेंच मोटार वा दुचाकी चलयतना लोक रस्त्या कुशीक सिगर आनी विडियो पेटिल्ल्यो उडयतात देखून कुशीक आशिल्लीं रानां पेट घेतात.

वट्ट 116 घडणुंकां मदीं 3 घडणुको फक्त 2022 वर्सा सांगें म्हालांत घडल्यो. पूण 2023 वर्सा उज्याच्या घडणुकांनी बरीच वाड जाली. ह्या काळांत उज्याच्यो घडणुको 3 वेल्यान 102 चेर पावल्यो. सगल्यांत चड घडणुको धारबांदोडें म्हालांत जाल्यो. थंयसर 28 रानांक उजो लागपाच्यो घडणुको घडल्यो. उपरांत काणकोणां 22 आनी सत्तरेंत 20 उजो लागपाच्यो घडणुको घडल्यो. जाल्यार सांगें म्हालांत 13, केप्यां 7, बार्देस 3, फोंडें 3, पेडण्यां 2 आनी दिवचले 1 उजो लागपाची घडणूक घडली.

ह्या वर्सा 2 मे 2024 मेरेन 11 रानांक उजो लागपाच्यो घडणुको घडल्यो. चडांत चड 6 घडणुको धारबांदोडें म्हालात घडल्यो. जाल्यार केप्यां 2, काणकोणां, सांगें आनी सत्तरी दरेकी 1 घडणूक घडली.

रानांक उजो लागपाच्यो घडणुको उण्यो जावच्यो हे खातीर जतनाय घेवपाच्या येवजण्यांची म्हायती रानां खात्यान दिली. राज्यांत रानांक उजो लागपाचे घडणुकेक तोंड दिवपा खातीर राज्य कृती आराखडो तयार आसा. रानांक उजो लागपाचे घडणुकेचे निवारण करपी विभाग, जिल्हो प्रशासन, उजो पालोवपी दळ हांचे तयारीचो नियाळ वेळावेळार प्रधान मुखेल रान संरक्षकाच्या फुडारपणा खाला नेमिल्ली समिती घेता.

रानांक उजो लागपाची शक्यता उणी करपा खातीर संरक्षण कॅम्प, वॉच टोवर हे सारिकिल्ल्यो सुविधा उबारप आनी उच्याची घडणूक घडत जाल्यार ताची येसाय घेवप हे सारिकिल्ले उपक्रम सुरू केल्यात.

फावो ती आवतां, यंत्रणां सगल्या फिल्ड विभागां कडेन आसात. रोखडीच कृती जावचे खातीर राज्य आपत्ती वेवस्थापन आनी उजो पालोवपी दळा सयत पंचायती, पालिका लेगीत हाय अलर्टाचेर दवरल्यात.

तशेच कांपाल पणजे रानां खात्याचे रेंज कचेरेंत 24 वरां चलपी कंट्रोल रुम स्थापन केला. रान क्षेत्रांतल्या काजू शेतकारांक उजो घालपा विशीं शेतकी खातें म्हायती दिवन तांचें मदीं जागृताय घडोवन हाडटा अशें रानां खात्यान लेखी जापेंत म्हणलां.