भांगरभूंय | प्रतिनिधी
मडगांव : कॉंग्रेसींत आसतना २०२० वर्सा प्रतिमा कुतिन्होंच्या फुडारपणा खाला दुचाकी तिरडीचेर घालून ’राम नाम सत्य है’ म्हणत आंदोलन केल्लें. ह्या वेळार रामाचें नाम घेवन हिंदुंच्यो भावना दुखाविल्ल्यान कुतिन्हों आड गुन्यांव नोंद जाल्लो. न्यायालया वतीन अजामीनपात्र वॉरंट जारी केले उपरांत आयतारा प्रतिमा हांकां मडगांव पुलिसांनी ताब्यांत घेतली.
काँग्रेस पक्षांत आसतना प्रतिमा हांणी विवीध आंदोलनां केल्लीं. २०२० त जुलय म्हयन्यांत दक्षीण गोंय जिल्लो बायलां काँग्रेसी वतीन इंधन दर वाड जाल्ल्याचो निशेद जालो. ह्या वेळार मडगांव ओल्ड मार्केट सावन दक्षीण गोंय जिल्लोधिकारी कार्यालया मेरेन रॅली काडिल्ली. तेन्ना दुचाकी तिरडीर दवरून तीं खांदार उखलून घेवन प्रतिकात्मक आंदोलन केल्लें.
ह्या आंदोलना उपरांत फातोर्डा पुलिसां वतीन हिंदू भावांच्यो धर्मीक भावना दुखावल्ल्या प्रकरणांत गुन्यांव नोंद केल्लो. तशेंच हे विशींची चार्टशिटूय जुलयांत दाखल केल्लें. न्यायालयांत हे विशीं सुनावणी सुरू आशिल्ली. न्यायालयान ह्या प्रकरणांत प्रतिमा कुतिन्हो हांचे आड अजामीनपात्र वॉरंट जारी केला. ते प्रमाण मडगांव पुलीस शेनवारा प्रतिमा कुतिन्हो हांच्या घरा तिका सोदपाक गेल्ले. मात ती घरा मेळूंक ना. उपरांत आयतारा सकाळीं मडगांव पुलीस परत कुतिन्हो हांच्या घरा गेले आनी तिका पुलिसांचे गाडयेंतल्यान मडगांव पुलीस स्टेशनाचेर हाडली. सध्या मडगांव पुलिसां वतीन प्रतिमा कुतिन्हो हांकां ताब्यांत घेतल्या. का सोमारा न्यायालयांत हजर करतले अशें समजता.
प्रतिमा कुतिन्हो हांणी सांगलें, राज्य सरकारा आड आवाज काडिल्ल्यान आयतारा घरा येवन पुलिसांनी म्हाका ताब्यांत घेतलें. आपल्या घोवा वांगडा पुलिशेंत येतां अशें सांगून लेगीत तांणी आयकूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
