भांगरभूंय | प्रतिनिधी
माॅस्को, खबरां संस्था ः चार वर्सां सावन बेपत्ता आशिल्ले जर्मन-अमेरिकन अब्जाधीश कार्ल-एरिव्हान हौब रशियेंत आसा. हौब एप्रील 2018 वर्सा निमाणे स्वित्झर्लंडांतल्या झर्मेट शारांत दिशिल्ले. हौब ते वेळार थंय सुटयेर आयिल्ले.
मजगतीं, तांच्या बेपत्ता जाल्ल्याची खबर आयले उपरांत स्वित्झर्लंड आनी जर्मन सरकारांनी सोद कारवाय सुरू केली. हौब हांकां सोदपा खातीर 5 हेलिकॉप्टरांनी 6 दीस सोद मोहीम केली.
हौब टेंगलमन गटाचो धनी
सोद कारवाय करतना हौब मेळ्ळे नात तेन्ना जर्मन न्यायालयान 2021 वर्सा तांकां कायदेशीर रितीन ‘मेले’ अशें जाहीर केल्लें. संवसारभर 75 हजारां परस चड कर्मचारी आशिल्ल्या रिटेल कंपनी टेन्झेलमन गटाचे ते धनी. न्यायालयाच्या निर्णया उपरांत ही कंपनी तांचे भाव ख्रिश्चन चलयतात. हौब हांकां दोन भुरगीं आसात.
हौब हांणी आपली इश्टीण वेरोनिका एर्मिलोव्हाक 13 फावटीं फोन केल्लो आनी एक वर उलयलो. ताका लागून दोनूय देशांच्या संयुक्त तपास यंत्रणेक तांचेर दुबाव आयलो. हाचे उपरांत एजन्सी मॉस्कोंत चवकशी केली आनी हौब थंय ताचे इश्टीणी वांगडा रावता अशें कळ्ळें.
2008 त इश्टीणी वांगडा रचलो कट
हौब आनी एर्मिलोव्हा हांणी 2008 वर्सा मॉस्कोंत एकठांय हो कट रचलो अशें तपास यंत्रणेन सांगलें. हाचे उपरांत हौब रशियेक भेट दिवपाक लागलो. एर्मिलोव्हा ही रशियेचे सुरक्षा एजन्सी एफएसबींत काम करता. हौब सध्या रशियेंत सुशेगाद रावता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
