भांगरभूंय | प्रतिनिधी
2019 त कळंगूटे सयत ताळगांव, सांताक्रुझ मतदारसंघांनी धपको
2014 वर्सा जाल्ले लोकसभा वेचणुकेंत कळंगूट मतदारसंघ सोडून उत्तर गोंयच्या 19सय मतदारसंघांनी भाजपाचे उमेदवार श्रीपाद नायक हांणी आघाडी घेतिल्ली. पूण 2019 वर्सा जाल्ले लोकसभा वेचणुकेंत कळंगूटे सयत ताळगांव आनी सांताक्रुझ ह्या मतदारसंघानी नायक हांका धपको बसलो. आतां येता ते 2024 वर्साचे वेंचणुकेंत ह्या मतदारसंघानी श्रीपाद नायक हांची राजकी परिस्थिती कशी आसतली हो एक प्रस्न जावन रावला.
2014ची लोकसभा वेंचणूक भाजपाचे उमदेवार श्रीपाद नायक हांणी काँग्रेसीचो उमेदवार रवी नायकहांचे आड लडयिल्ली. फक्त कळंगूट मतदारसंघांत अतिटतीची लडत जावन श्रीपाद नायक हांकां उणीं मतां पडलीं. जाल्यार हेर 19सय मतदारसंघांनी व्हड मतांची आघाडी घेतिल्ली. जाल्यार 2019ची लोकसभा वेचणूक श्रीपाद नाईक हांणी काँग्रेसीचे उमेदवार गिरीश चोडणकार हांचे आड लडयिल्ली. त्यावेळार कळंगूट मतदारसंघान नायक हांकां परतून एक फावट न्हयकाललो. तेच बराबर ताळगांव आनी सांताक्रुझ मतदारसंघांनीय तांच्या मतांच्या आघाडीत उणाव जालो.
2014चे वेंचणुकेंत कळगूंट मतदारसंघात श्रीपाद नायक हांकां 8187 मतां मेळिल्लीं, जाल्यार रवी नायक हांकां 8302 मतां मेळिल्लीं. 115 मतांची आघाडी काँग्रेसीन घेतिल्ली. जाल्यार 2019चे वेंचणुकेंत कळंगूट मतदारसंघात तांची मतसंख्या सामकीच देंवली. नायक हांकां 7693 मतां पडलीं जाल्यार चोडणकार हांकां 10151 मतां पडलीं.
2014चे वेंचणुकेंत श्रीपाद नायक हांकां ताळगांवां 9469 मतां पडिल्लीं जाल्यार रवी नाईक हांकां 8591 मतां पडिल्लीं. श्रीपाद नायक हांणी 878 मतांची आघाडी घेतिल्ली. पूण 2019चे वेंचणुकेंत चित्र बदल्लें श्रीपाद नायक हांकां 9258 मतां पडलींजाल्यार चोडणकार हांकां 10906 मतां पडलीं. श्रीपाद नायक हांचे मतसंख्येंत ताळगांवां 1648 मतांचो उणावजालो.
जाल्यार शेजारच्या सांताक्रुज मतदारसंघांत तीच परिस्थिती. 2014चे वेंचणुकेंत श्रीपाद नायक हांणी 9124 मतां मेळयिल्लीं, जाल्यार रवी नायकहांकां 8775 मतां पडिल्लीं. 349 मतांची आघाडी तेन्ना श्रीपाद नायक हांणी घेतिल्ली. पूण 2019 वर्सा श्रीपाद नायक हांकां 8612 मतां जाल्यार चोडणकार हांकां 11478 मतां मेळिल्लीं. सांताक्रुझ मतदारसंघांत श्रीपाद नायक हांची आघाडी वट्ट 2,866 मतांनी देंवली.
भाजपाचें मताधिक्य
2014 2019
कळंगूट- 8187 कळंगूट- 7693
ताळगांव- 9469 ताळंगाव- 9258
सांताक्रुज-9124 सांताक्रुज- 8612
काँग्रेसीचें मताधिक्य
कळंगूट- 8302 कळंगुट- 10151
ताळगांव- 8591 ताळगांव- 10906
सांताक्रुज-8775 सांताक्रुज- 11478
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
