भांगरभूंय | प्रतिनिधी
म्हापशें, प्रतिनिधी ः धारगळेंतली 2012 वर्सा विकिल्ली जमीन परतून विकून म्हापशेंतल्या एका मनशाची 55 लाखांची फटवणूक केल्ल्यान पेडणें पुलिसांनी आवय आनी पूत हांचे आड गुन्यांव नोंद केला. विजया रमेश प्रभुदेसाय आनी देवेंद्र रमेश प्रभुदेसाय अशीं दुबावीतांचीं नांवां आसात. ह्या प्रकरणांत म्हापशेंच्या प्रकाशराव दत्तराम नायक हांणी कागाळ दाखल केल्या.
आवय आनी पुतान धारगळेंतल्या सर्वेक्षण क्रमांक 428/ 0 मदलीं जमीन मरड- म्हापश्यां रावपी प्रकाशराव नायक हांकां 55 लाखांक विकिल्ली. ताचे विक्री पत्र (सेल डीड) 23 ऑक्टोबर 2017 दिसा पेडणेंच्या उपनिबंधक कार्यालयांत केल्ले. मजगतीं, हीच जमीन आवय- पूतान 2012 वर्सा संतोष दहिया हाका (रा. पितमपुरा-दिल्ली) विकिल्ली अशें नायक हांकां कळ्ळें.
ताचीय नोंदणी पेडणेंच्या उपनिबंधक कार्यालयांत केल्ली. ह्या प्रकरणांत 55 लाखांची फटवणूक जाल्ल्याचें कळटकच प्रकाशराव नायक हांणी मंगळारा 18 जूनाक पेडणें पुलिशेंत कागाळ केली. पेडणेंचे पुलीस निरिक्षक नारायण चिमुलकार हांच्या फुडारपणा खाला उपनिरिक्षक योगेश मांद्रेकार फुडली चवकशी करतात.
मजगतीं, एकाच सर्वेक्षण क्रमांकाच्या जमनीचो विक्री वेव्हार एकाच उपनिबंधक कार्यालयांत दोन फावटीं कसो जाता, असो प्रस्न उप्रासला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
