भांगरभूंय | प्रतिनिधी
भारतांतल्या 103 कोटी लोकांक बरें शिक्षण, भलायकी आनी निवळ उदकाची गरज ह्या खातीर निधी एकठांय करपाचें काम चालू आसा.–
अमेरिकेंतल्या मूळ भारतीय लोकांनी व्हड संकल्प सोडला. 14 नॉन प्रॉफिट संस्थेच्या इंडिया फिलांथ्रॉपी अलायन्स (आयपीए) हे संयुक्त संघटने वरवीं 2 मार्च 2023 दिसा ‘इंडिया गिव्हिंग डे’ मनोवपाची घोशणा केल्या. ह्या दिसा भारतांत मानवतावादी आनी उदरगतीचे ध्येय साध्य करपाक अर्थीक मजत एकठांय करतले. आयपीए दर वर्सां एक अब्ज डॉलर (8,219 कोटी रुपया) एकठांय करता जाल्यार फुडल्या वर्सां 3 अब्ज डॉलर (24,657 कोटी रुपया) एकठांय करपाचो निश्चेव केला. ही रक्कम भारतांतली गरिबी आनी उपासमारी खातीर, तशेंच वेगवेगळ्या कामां खातीर वापरतले.
गांधी जयंती निमतान 2 ऑक्टोबराक वॉशिंग्टनांत जाल्ले कार्यावळींत ‘इंडिया गिव्हिंग डे’ मनोवपाचो निर्णय आयपीएन घेतला. हे खातीर अमेरिकेंत रावपी भारतीय तरणाट्यांक एकवटीत करपाक 2 मार्चा पयलीं 10 दिसांची खाशेली मोहीम आयोजित करतले. आयपीएच्या म्हणण्या प्रमाण, हाका लागून भारत- अमेरिकेचे संबंदय घटमूट जातले.
भारतान स्वातंत्र्य मेळयले उपरांत फकत 75 वर्सां पुराय केल्यात, अशें इंडिया फिलांथ्रॉपी अलायन्सचे अध्यक्ष दीपक राज हांणी सांगलें. अजून जायतें साध्य करपाचें उरलां. ते खातीर फकत सरकाराचेर आदारून रावप योग्य न्हय. दरेक भारतीय आपल्या कमाईचो एक भाग आमकां दिवपाक तयार आसत जाल्यार भारत खूब प्रगती करतलो. अमेरिकेच्या अर्थवेवस्थेंत भारतीय मूळच्या लोकांनी खूब योगदान दिलां, अशें आयपीएंत आशिल्ल्या सेजल देसाय हांणी सांगले. आमच्या देशाचोय विचार करप गरजेचें आसा. अमेरिकेंतल्या भारतीयांनी हाचे पयलीं वेगवेगळे तरेन अर्थीक मजत केल्या. पूण हे खेपे आमचो यत्न व्हड प्रमाणांत निधी एकठांय करपाचो आसा.
भारतांतल्या 103 कोटी लोकांक बरें शिक्षण, भलायकी आनी निवळ उदकाची गरज ह्या खातीर निधी एकठांय करपाचें काम चालू आसा. संयुक्त राष्ट्र संघटनेच्या एका अहवाला प्रमाण भारतांतल्या सुमार 103 कोटी लोकांक अजूनय दर्जेदार शिक्षण, भलायकी, निवळ उदक आनी हेर मुळाव्या वस्तूंची गरज आसा. भारता कडेन संबंदीत आशिल्ल्या सगळ्यांक इंडिया गिव्हिंग डेंत वांटो घेवपाचें आवाहन आयपीएचे संचालक अॅलेक्स काउंट्स हांणी केलां. अमेरिकेंत रावपी भारतीय मुळाच्या लोकांक 2 मार्च 2023 हो दीस आपल्या कॅलेंडरांत नोंद करचो, अशें आवाहन तांणी केलें. आमच्या समाजांतल्या कोटी गरजेवंत लोकांक तुमची गरज आसा असो विचार करात. अमेरिकेंतल्या हे नॉन प्रॉफिटेबल संघटनेच्या संकेतथळाचेर (www.indiagivingday.org) वचून ‘इंडिया गिव्हिंग डें’त वांटो घेवपा खातीर अर्ज करुं शकतात. हे संस्थेन एकठांय केल्लो निधी भारतांतल्या वेगवेगळ्या कल्याणकारी संस्थांक धाडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
