भांगरभूंय | प्रतिनिधी
पणजी : गोंयांत 1 ते 19 जून ह्या काळांत सरासरी 6.53 इंच पावसाची नोंद जाल्या. अंदूं मॉन्सूनाच्या पावसाचें प्रमाण सरासरी परस 68.9 टक्क्यांनी उणें आसा. 1 ते 20 जून ह्या काळांत 2010 सावन पावसाचें प्रमाण पळयत जाल्यारय अंदूं 16 वर्सांतल्या दुसऱ्या सगल्यांत उण्या पावसाची नोंद जाल्या. हाचे आदीं 2023 त 1 ते 20 जून ह्या काळांत पावसाचें प्रमाण सरासरी परस 71 टक्क्यांनी उणें आशिल्लें. अशें आसलें तरी 2023 त 21 ते 30 जून ह्या काळांत समाधानकारक पावसाची नोंद जाल्ली. हाका लागून सरासरी 71 टक्क्यां वयल्यान उणी जावन 30 टक्क्यां मेरेन पावल्ली.
गोंयांत 2023 आनी 2026 त 1 ते 20 जून ह्या काळांत पावसाची सगल्यांत चड तूट नोंद केल्या. 2019 त गोंयांत मॉन्सून 20 जूनाक पाविल्लो. त्या वर्सा पावसाची तूट 56 टक्के आशिल्ली. 2022 त मॉन्सून 10 जूनाक पाविल्लो आनी 20 जूना मेरेन पावसाची तूट 47 टक्के आशिल्ली.
2010 त मॉन्सून 7 जूनाक पाविल्लो आनी 20 जून मेरेन पावसाची तूट 32 टक्के आशिल्ली. 2014 त 11 जूनाक मॉन्सून पाविल्लो आनी 20 जून मेरेन पावसाची तूट 23 टक्के आशिल्ली. जाल्यार 2016 त मॉन्सून 19 जूनाक पाविल्लो आनी पावसाची तूट 18 टक्के आशिल्ली.
मेळिल्ले म्हायती प्रमाम, गोंयांत 2011, 2020 आनी 2021 त 1 ते 20 जून मेरेन पावस सरासरी परस 20 ते 59 टक्के चड आशिल्लो. 2012, 2013, 2015, 2016, 2017, 2018, 2024 आनी 2025 त 1 ते 20 जून ह्या काळांत पावस सरसरी परस 19 टक्के उणो जाल्यार 19 टक्के चड आशिल्लो.
2010, 2014, 2019 आनी 2022 त वयल्या 20 दिसांत पावस 20 ते 59 टक्के उणो आशिल्लो. अंदूं हवामान खात्यान अल निनो प्रणाली सक्रीय जाल्ल्याचें स्पश्ट केलां. अल निनोक लागून मॉन्सूनाचें प्रमाण उणें जाता. गोंयांत उदकाचो उणाव जावचो न्हय हे खातीर गोंय सरकारान आतां सावनूच विवीध उपाय येवजण्यो चालीक लायल्यात.
दोन दीस पावसाचो यलो अलर्ट
हवामान खात्यान गोंयांत 21 आनी 25 जून मेरेन पावसाची शक्यताय उक्तायल्या. जाल्यार 22 आनी 23 जूनाक पावसाचो यलो अलर्ट जारी केला. शुकारा पणजे चडांत चड 34 अंश आनी उण्यांत उणें 27 अंश सेल्सियस तापमानाची नोंद जाल्या. फुडले स दीस गोंयांतलें चडांत चड तापमान 32 ते 35 अंश आनी उण्यांत उणें तापमान 27 ते 28 अंश सेल्सियस मेरेन आसपाची शक्यताय आसा. 20 जूनाक गोंयांतलें वातावरण उश्ण आनी दमट आसपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
