भांगरभूंय | प्रतिनिधी
उजो पालोवपी दळाक 2 कोटींचो म्हालवज वाटावपाक येस
पणजी: फाटल्या कांय दिसांनी गोंयांत पावसाचें प्रमाण तुळेन उणें जालां. अशें आसलें तरी गोंयांत सगली कडेन वादळी वाऱ्याक लागून जावपी लुकसाणीच्या घडणुकांची संख्या वाडल्या. हातूंत रस्त्यांचेर, विजेच्या खांब्याचेर, घरांचेर आनी वाहनांचेर झाडां वा खांदे पडून जाल्ल्या लुकसाणीचें प्रमाण चड आसा. फाटल्या पंदरा दिसांत उजो पालोवपी दळाक झाडां पडिल्ले संबंदी 1088 कॉल आयले. ह्या घडणुकां मदीं 1.07 कोटी रुपयांच्या म्हालवजाचें लुकसाण जालें. जाल्यार दळाक 2.19 कोटी रुपयांचो म्हालवज वाटावपाक येस आयलें.
मेळिल्ले म्हायती प्रमाण, फाटल्या 24 वरांत पावस, वादळी वाऱ्याक लागून जाल्ल्या लुकसाणे संबंदी 174 घडणुकांची नोंद जाली. हातूंत सुमार 24 लाख रुपयांच्या म्हालवजांचें लुकसाण जालें. मंगळारा गोंयांत मध्यम ते उटंगाराच्या पावसाची नोंद जाली. 24 वरांत 1.19 इंच पावसाची नोंद जाली. ह्या वेळार सांग्यार 3.79 इंच पावसाची नोंद जाली. गोंयांत 1 जून ते 7 जुलय मजगतीं, सरासरी 34.39 इंच पावसाची नोंद जाली. अंदूं पावसाचें प्रमाण 24.6 टक्क्यांनी उणें आसा.
गोंयांत 1 जून ते 7 जुलय मजगतीं काणकोणां सगल्यांत चड 48.93 इंच पावसाची नोंद जाली. धारबांदोड्यां 41.14 इंच, मडगांवां 38.92 इंच, सांग्यार 36.32 इंच, फोंड्यां 35.51 इंच, वाळपय 36.04 इंच पावसाची नोंद जाली. पावसाक लागून धरणांतल्या उदकाच्या सांठ्यांत वाड जायत आसा.
7 जुलय अखेरेक गावणें धरणांत 69 टक्के, आमठाणें धरणांत 65.9 टक्के, चापोली धरणांत 53.9 टक्के, साळावली धरणांत 42.5 टक्के, तिलारी धरणांत 43.3 टक्के, पंचवाडी धरणांत 36.9 टक्के जाल्यार अंजूणें धरणांत 21.5 टक्के उदका सांठो शिल्लक आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
