भांगरभूंय | प्रतिनिधी
पांच पंचायती खातीर मोर्ल्यां उबारतले नवो प्रकल्प
वाळपय: गोंय सरकाराच्या शिंपणावळ खात्या वतीन गोंयांतली कृशी, बागायती निंबून आसात. ह्या खात्या वतीन शेतां आनी बागायतीं खातीर उदका पुरवण करतात. दर वर्सा ही उदका पुरवण केन्ना जातली हाचे कडेन शेतकार भावांचें लक्ष आसता. हाका लागून तांचे वेळापत्रक इबाडटा. अंदूं मात थारिल्ले प्रमाण 15 नोव्हेंबर मेरेन गोंयच्या सगल्या वाठारांनी शिंपणावळ खात्या वतीन उदका पुरवण करतले. हे विशींचो आदेश अधिकाऱ्यांक दिला आनी ताची अंमलबजावणी जाली ना जाल्यार संबंदीत अधिकाऱ्याचेर कारवाय करपाची शिटकावणी शिंपणावळ मंत्री सुभाष शिरोडकार हांणी दिली.
चरावणें धरणाची संकल्पना प्राधान्यान हातांत घेतले. मे 2023 मेरेन ह्या प्रकल्पाचें भूंयपुजन करपाचो यत्न आशिल्ल्याचें तांणी ह्या वेळार सांगलें.
पर्यें मतदारसंघांतल्या पांच पंचायतींची पियेवपाच्या उदकाची समस्या सोडोवपा खातीर मोर्ल्यां नवो प्रकल्प उबारतले. हे खातीर शिंपणावळ खातें आपली जमीन उदका पुरवण खात्याक सुपूर्द करतले अशें शिरोडकार हांणी सांगलें.
शिंपणावळ खात्याचे मंत्री सुभाष शिराडकार हांणी काल (बुधवारा) दीसभर थळाव्यो आमदार आनी गोंय रान विकास म्हामंडळाच्यो अध्यक्षा डॉ. देविया राणे हांचे हाजिरेंत शेतां खातीर उदका पुरवण आनी पियेवपा खातीर उदक उपलब्ध करपाचे नदरेंतल्यान वेगळ्यावेगळ्या पांवड्यार चर्चा केली.
मोर्ल्यां आयोजीत केल्ले पांच पंचायतीचे सरपंच, उपसरपंच, पंच वांगडी शिंपणावळ खात्याचे अधिकारी, वीज खात्याचे अधिकारी आनी उदका पुरवण खात्याचे अधिकारी हांचे सयत मंत्री सुभाष शिरोडकार हांणी विस्तारान चर्चा केली.
पर्यें मतदारसंघांतले केरी, मोर्लें, पर्यें, होंडा, पिसुर्लें ह्या पांच पंचायतीच्या पियेवपाच्या उदकाची समस्या सोडोवपा खातीर मोर्ल्यां नवो प्रकल्प उबारतले. व्हाळवाट न्हंयेच्या उदकाचेर शुद्धीकरण करून हें उदक प्रकल्पाच्या माध्यमांतल्यान ह्या पंचायतींक दितले. हे खातीर उदका पुरवण कचेरेन आराखडो सादर करपाचे निर्देश ह्या वेळार मंत्री सुभाष शिरोडकार हांणी दिले.
तेच प्रमाण हो प्रकल्प उबारपा खातीर व्हाळवाट न्हंयेंतल्यान उदकाची पुरवण भौशीक उदका पुरवण खात्या खातीर उपलब्ध करतले, आनी ते खातीर 20 कोटी रुपयांची तरतूद केल्ल्याचें मंत्री शिरोडकार हांणी सांगलें. हे विशींची म्हत्वाची बसका फुडल्या सप्तकांत जातली आनी एकूण प्रस्तावा विशींचो नियाळ घेतले अशेंय तांणी म्हणलें.
सत्तरी म्हालांतल्या अंजुणे धरण प्रकल्प आनी शिंपणावळ खात्या वतीन राबयतल्या उपसा येवजणेंतल्यान शेतकार भावांक उदकाची पुरवण करतात. पूण ही उदका पुरवण थारावीक वेळेंत जावंक शकना. हाका लागून शेतकार भावांक समस्यांक तोंड दिवचें पडटा. हाचो अभ्यास करून अंदूं 15 नोव्हेंबर मेरेन उदकाची पुरवण उपलब्ध करतले. हातूंत कसलोच कळाव जावचो न्हय अशे निर्देश ह्या वेळार मंत्री सुभाष शिरोडकार हांणी शिंपणावळ खात्याच्या अधिकाऱ्यांक दिले. हाजीर आशिल्ले खात्याचे मुखेल अभियंते प्रमोद बदामी हांणी हे विशीं विशेश लक्ष दिवचें असो आदेशूच मंत्र्यानी दिलो.
केरी सत्तरी हांगासरल्या आजोबा देवस्थानाचे कुशीक आशिल्ली आजोबाची तळी हाचो विकास करतले. ही तळी खूब पोरणी आसा. हे तळयेच्या उदकाचो वापर सरभोंवतणच्या वाठारांनी आशिल्ल्या शेती बागायती खातीर करतात. हे तळयेचो विकास जायत जाल्यार व्हड प्रमाणांत उदकाचो सांठो जावन चड जमीन उदका खाला येतली. हे विशींचो प्रस्ताव जाता तितले बेगीन तयार करचो अशे आदेश मंत्री सुभाष शिरोडकार हांणी दिले.
हे विशीं उलयतना आमदार डॉ. देविया राणे हांणी सांगलें, शिंपणावळ खात्याच्या माध्यमांतल्यान उपलब्ध जावपी उदकाचो सांठो हो पुरायपणान शेतांच्या विकासा खातीर जावचो. शेतकार भावांक आधुनीक शेतीच्या माध्यमांतल्यान अर्थीक विकासाक चालना दिवची. मंत्र्यांनी ह्या वाठारा कडेन विशेश लक्ष दिवचें अशी विनंती तांणी ह्या वेळार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
