भांगरभूंय | प्रतिनिधी
कोयर वेवस्थापना विशीं आडनदर केल्ल्याचो ठपको
भांगरभूंय प्रतिनिधी
पणजी ः कोयर वेवस्थापना विशीं वेळावेळार निर्देश दिवनय मटेरियल रिकव्हरी फॅसिलिटी (एमआरएफ) विशीं कांयच करिनात असो ठपको दवरून मुंबय उच्च न्यायालयाच्या गोंय खंडपीठान सांताक्रूझ पंचायतीचे सरपंच आंतोनियो डायस हांचे सयत 13 पंचायतींच्या प्रशासकांक खंडपीठाचो अवमान केल्ल्या प्रकरणांत कारणां दाखय नोटिशी धाडल्यात. ते भायर 11 जुलया आदीं प्रतिज्ञापत्र सादर करून बाजून मांडपाचो निर्देश जारी करून फुडली सुनावणी 19 जुलयाक दवरल्या.
कोयर वेवस्थापन विशीं कितल्याश्याच फावटीं निर्देश दिवनूय एमआरएफ विशीं कांयच करिनात असो ठपको दवरून खंडपीठान सांताक्रूझा सयत हळदोणें, कुंडय ह्या तीन पंचायतींक न्यायालयाचो अवमान केल्ल्याच्या कायद्या खाला कारणां दाखय नोटीस जारी केल्ली. तशेंच वयल्या पंचायतींचे सरपंच वा उपसरपंच आनी सचिवांक खंडपीठांत हाजीर रावपाचो आदेश दिल्लो.
उपरांत सांताक्रूझाचे सरपंच आंतोनियो डायस हांणी 20 जून 2022 दिसा आदीं जाल्यार हळदोणें आनी कुंडय पंचायतींनी 15 आॅगस्ट 2022 जाल्यार मटेरियल रिकव्हरी
फॅसिलिटी सुरू करपाची हमी खंडपीठाक दिल्ली. उपरांत गोंय प्रदूशण नियंत्रण मंडळान पंचायतीची पळोवणी करून खंडपीठांत प्रतिज्ञापत्र सादर केलें. तातूंत एमआरएफ सांताक्रूझ पंचायती सयत हळदोणें, कुंडय, मोरजी, हडफडें-नागोवा, कामुर्ली, कांदोळी, पिळर्ण, शिवोली-सडयें, सेंट लाॅरेन्स, केळशी, राशोल आनी भाटी पंचायतींत एमआरएफ सुविधा ना वा अजून सुरू जावंक नाशिल्ल्याची माहिती दिली.
हाची दखल घेवन खंडपीठान सांताक्रूझ पंचायतीचे सरपंच डायस हांकां खंडपीठाचो अवमान केल्ल्या प्रकरणांत कारणां दाखय नोटिशी धाडल्यात जाल्यार वयल्या हेर पंचायतीच्या प्रशासकांकूय कारणां दाखय नोटिशी जारी केल्यात. 11 जुलय आदीं प्रतिज्ञापत्र सादर करून बाजू मांडपाचो आदेश खंडपीठान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
