भांगरभूंय | प्रतिनिधी
भांगरभूंय । प्रतिनिधी
वाळपयः वाळपयच्या पुलीस प्रशिक्षण केंद्रांत प्रशिक्षण घेतल्ले 299 पुलीस सरकारी सेवेंत दाखल जाले. तातूंत 124 बायलो आनी 175 दादल्यांचो आसपाव आसा. नापास जाल्ल्या 75 प्रशिक्षणार्थींक आनीक तीन म्हयन्याचें अतिरिक्त प्रशिक्षण घेवचें पडटलें. मुख्यमंत्री डॉ प्रमोद सावंत हांणे प्रशिक्षण केंद्राच्या मैदानार आयोजीत केल्ल्या दीक्षांत कार्यावळींक हाजीर रावन पुलिसांक पुलिस खात्याचे सेवेंत दाखल करून घेतलें. ह्या वेळार तांणी पुलीस संचलनाची पळोवणी केली.
पुलीस समाजाचे राखणदार आसतात. तांणी समाजाचे कान आनी दोळे जावन समाजांत जावपी वायट गजालींचेर नदर दवोरपाक जाय. दक्षता, शांती, सेवा आनी भलायकी हे पुलिसांचें ब्रीद वाक्य आसा. ताका जागून तांणी काम करपाक जाय असो सल्लो मुख्यमंत्र्यांनी नव्या पुलिसांक दिलो.
दीक्षांत कार्यावळीक पुलीस म्हासंचालक जसपाल सिंग आनी हरे वरिश्ठ अधिकारी हाजीर आशिल्ले. गोंयांत पुलीस बरे तरेन काम करतात. पुलीस खात्यांत दाखल जाल्ल्या प्रशिक्षणार्थींनी पुलिसांची खाकी वर्दी मेळटगीर जबाबदारीन वागपाक जाय. आपल्याचेर कसलेय आरोप जावचे ना हाची जनताय घेवपाक जाय. पुलीस खात्याची प्रतिमा सामाळून दवोरपाक जाय. प्रशिक्षणा वेळार जें कितें शिकयलां ते प्रत्यक सेवा काळांत अंमलांत हाडपाक जाय अशें मुख्यमंत्र्यांनी सांगलें. राजकारणी आज आसात, फाल्यां आसचे नात. पुलीस कर्मचार्यांक निवृत्त जाय मेरेन काम करचें पडटा. चेपणा खाला येवून आपल्या कर्तृत्वांत चूक जावची ना तशेंच तणावाच्या वेळार तकली शात दवोरून तांणी काम करपाक जाय अशेंय मुख्यमंत्र्यांनी सांगलें जे 75 प्रशिक्षणार्थी नापास जाल्यात ते विशीं तांच्या पालकांनी हुस्को करपाची गरज ना. तांकां आनी तीन म्हयने प्रशिक्षण दिवंन पुलीस खात्यांक घेतले अशे मुख्यमंत्र्यान सागलें. समाजांत पुलिसांची विश्वासार्हता धोक्यांत येवची ना हाची जतनाय घेवची. कर्तव्याक पाळो दिवंन पुलीस खात्याची शान वाडोवची अशें जसपाल सिंग हाणे सांगलें.
फाटले णव म्हयने पुलिसांचे नवे तुकडीक प्रशिक्षण दिलें. बरी कामगिरी करून दाखोवपी प्रशिक्षणार्थींक मुख्यमंत्री डॉ सावंत हाचे हस्तुकीं यादस्तिकां भेटयली. संजय वरक व्हो सर्वोत्कृश्ठ प्रशिक्षणार्थी थारलो. ऐश्वर्या नायक, ऋषिकेश शेट, सौरभ नायक, केदार च्यारी आनी आत्माराम पोते हांका मुख्यमंत्र्यान पुरस्कार भेटयले.कार्यावळीचें सूत्रसंचालन अमित नायक हाणे केलें. प्रशिक्षण केंद्राची प्राचार्य सुचिता देसाय हिणे प्रशिक्षणार्थींक सोपूत दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
