भांगरभूंय | प्रतिनिधी
पणजी: दाबोळी विमानतळ पुलीस स्टेशन आनी येरादारी विभागाचें काम आनीक सक्षमपणान चलचे खातीर विमानतळार १२१.६० चौरस मिटर सुवात पुलिसांक हस्तांतरीत करची, अशी म्हत्वाची शिफारस मानवाधिकार आयोगान केल्या. विमानतळ संचालकांनी मल्टी लेअर कार पार्कींग (बेसमेंट लेव्हल १) तल्या १९० चौरस मिटर सुवाते खातीर ही अतिरिक्त सुवात उपलब्ध करून दिवची, अशें आयोगान आपल्या निर्णयांत स्पश्ट केलें.
विमानतळार २०१३त पुलीस स्टेशनाची स्थापना केल्ली. मात, सुरवातेक सावनूच पुलिसांक तात्पुरत्या स्वरुपाच्या टीन कॅबिनांत काम करचें पडटालें. हे अपुर्ण सुवातेक लागून पुलिसांक गैरसोय जाताली, तशेंच कागाळ घेवन येवपी सामान्य नागरिकांकूय त्रासांक तोंड दिवचें पडटालें. हे परिस्थितीची मानवाधिकार आयोगान स्वेच्छा दखल घेतिल्ली. ह्या प्रकरणांत जाल्ले सुनावणे उपरांत नोव्हेंबर २०२५त आयोगान पयलीं १९० चौमी सुवात दिवपाची शिफारस केल्ली. प्रत्यक्षांत ताबो घेवपाची प्रक्रिया डिसेंबर २०२५त सुरू जाली.
मात, पुलीस महासंचालकांनी सुवातेचे गरजे विशीं आयोगा कडेन पुनरावलोकन याचिका दाखल केल्ली. ते प्रमाण आयोगान मार्च २०२६त प्रत्यक्ष सुवातेची पळोवणी केली. आयोगाच्या निरीक्षणांत अशें दिसून आयलें, सध्या पुलीस स्टेशन आनी येरादारी विभाग भारतीय विमानतळ प्राधिकरणाच्या मालमत्तेंतल्या १८२ चौरस मिटरच्या पोर्टेबल केबिनांत कार्यरत आसा. हातूंत फकत २४ चौरस मिटर सुवात नितळसाण घरा खातीर वापरतात, जाल्यार उरिल्ले मेकळे सुवातेचो वापर बसकां खातीर करतात.
विमानतळ प्रशासनाच्या बेसमेंट लेव्हल १त आदल्या १९० चौरस मिटर सुवाते मुखारच १२१.६० चौरस मिटराची आनीक सुवात उपलब्ध आशिल्ल्याचें आयोगाक दिसून आयलें. हाका लागन दोनूय सुवातो मेळून जाय तशी सुवात पुलिसांक मेळची, हाका लागून काम सुरळीत जातलें, अशें आयोगान सुचयलें. पुलीस महासंचालकांनीय ही सुवातेर गरजेच्यो सुविधा बेगोबेग उपलब्ध करून दिवच्यो, अशी शिफारस केली. हे शिफारशीचेर कितें कारवाय केली, हाचो कृती अहवाल २३ जून २०२६ मेरेन सादर करपाचे आदेशूय आयोगान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
