भांगरभूंय | प्रतिनिधी
पणजी, बातमीदार ः दिवचले वीज कामगार मनोज जांबावलीकाराक शॉक लागून मरण आयल्ल्याची खबर आयकून वायट दिसलें. 2019 ते 2024 मेरेन 71 मनीस आनी 30 जनावरांक शॉक लागून मरण आयलां. वीज मंत्री सुदिन ढवळीकार हांणी हाची नैतिक जापसालदारकी घेवन राजिनामो दिवचो अशी मागणी काँग्रेसचे उत्तर गोंयचे उमेदवार ॲड. रमाकांत खलप हांणी केली.
गोंयांत वीज वितरण वेवस्था सुदारपा खातीर गोंय सरकारान फाटल्या 5 वर्सांत 12 हजार कोटी रुपया खर्च केल्यात अशी म्हायती वीज मंत्री सुदिन ढवळीकर हांणी विधानसभेत दिल्ली. इतलो खर्च करून लेगीत लोक मरत आसात आनी लोकांक वीज पुरवण संबंदीय समस्या जातात अशें ॲड. खलप हांणी म्हणले.
गोंयांत वीज मुळावी बांदावळ पुरायपणान कोसळ्ळ्या. उद्देग, वेवसायीक आस्थापन आनी सरकारी खात्यां कडल्यान कितलेशेच कोटी रुपयांची व्हडली थकबाकी वसूल करपाक सरकाराक अपेस आयलां. पूण दोन म्हयने जर गरीब लोकांनी 500 रुपया दिवंक ना जाल्यार सरकार तांच्या घरांतली वीज जोडणी बेगीन काडटा अशें ॲड. खलप हांणी सांगलें.
असंवेदनशील भाजपा सरकारा कडल्यान गोंय मुक्त करपाचो वेळ आयला. कामार आसतना सरकारी कर्मचाऱ्यांक सुरक्षा दिवपाक दुर्लक्ष केल्ल्यान आमी सगळ्यांनी तांकां कायमचो धडो शिकोवया अशेंय ॲड. खलप हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
