भांगरभूंय | प्रतिनिधी
‘चैत्रपावली’ मराठी सुगम संगिताची जातली कार्यावळ
पणजी: मिरामार पणजे हांगासरल्या श्रीमारुतीराय मिरामार ट्रस्ट देवळांत मुर्ती प्रतिश्ठापनेचो 44 वो वर्धापन दीस शेनवारा 11 मे दिसा मनयतले. ते निमतान सांजवेळा 7 ते 9.30 वरां मेरेन निषाद क्रिएशन निर्मीत ‘चैत्रपावली’ ही मराठी भावगीतां, भक्तिगीतां, नाट्यगीतांची कार्यावळ जातली.
कलर्स मराठी वेले ‘सूर नवा ध्यास नवा’ आनी झी मराठी सारेगमचो ‘टॉप चार’चो मानकरी आदीश तेलंग (महाराष्ट्र) हो कार्यावळीचो आकर्शण आसतलो.
तशेंच गोंयची नामनेची गायिका स्नेहल कारखानीस आनी युगा सांबारी हे कार्यावळींत आपली कला सादर करतलीं. तांकां नितीन कोरगांवकार (तबलो), बाळकृष्ण मेस्त (सिंथेसायझर), हर्षद खराडे (ऑक्टोपॅड) आनी शुभम नायक (संवादिनी) हे नामनेचे वादक साथसंगत करतले जाल्यार नामनेची निवेदिका, लेखिका तशेंच अभिनेत्री श्रुती हजारे निवेदन करतली.
सकाळीं धर्मीक विधी जातलो. दनपारां तीर्थ प्रसाद तशेंच रातच्या 9.30 वरांचेर आरत्यो जाले उपरांत तीर्थ प्रसादान उत्सवाची सांगता जातली.
आदीश तेलंग
आदीश हो हालींच जाल्ल्या ‘सूर नवा ध्यास नवा’ चो उतजैतिवंत आसून ताका अक्षय कुमार, अनू कपूर हांचे कडल्यान खाशेली तोखणाय आनी उत्साहपूर्ण येवकार मेळ्ळा. बेंगाल टायगर्स कार्यावळींत आशा भोसले हांचे बरोबर गावपाचें भाग्य ताका मेळ्ळां. खूबशा राज्य पांवड्या वेल्यो सर्ती ताणें गाजयल्यात. रेडियो सीटी 91.1 सुपर लिगेचो तो जैतिवंत थारला. खूबशा वॅब फिल्मां खातीर ताणें पार्श्वगायन केलां.
स्नेहल काराखानीस
गायिका तशेंच अभिनेत्री स्नेहल हिणें मराठी रंगभुंयेर गाजिल्ल्या 15 परस चड संगीत नाटकांत भुमिका केल्यात. महाराष्ट्र राज्य नाट्य सर्तींत तिणें रुप्या पदक जोडलां. गोवा कॉलेज ऑफ थिएटर आर्टांत सहाय्यक प्राध्यापक म्हणूनय तिणें काम पळयलां. गोंय विद्यापिठांतल्यान मराठी विशयांत तिणें एमए केलां. मराठी आनी हिंदी वाद्यवृदांत गावपी उत्कृश्ट गायिका म्हूण तिची नामना आसा.
युगा सांबारी
कन्सोनन्स 2021 ह्या राष्ट्रीय पांवड्या वेले शास्त्रीय संगीत सर्तींत जैतिवंत थारिल्ली युगा हिणें 2019-20च्या सांस्कृतीक बुद्धिमत्ता सोद सर्तीतय जैतिवंत थारल्या. गोमंत कला असोसिएशनाच्या महोत्सवांत सेगीत तीन फावटी तिणें गावन आयडॉल जावपाचो मान मेळयला. मराठी संगीत नाटकांतल्यान तशेंच मराठी अकादमीच्या सवेश, साभिनय नाट्यगीत कार्यावळींतल्यान भुमिका करून तें तोखणायेक पात्र थारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
