भांगरभूंय | प्रतिनिधी
भांगरभूंय । प्रतिनिधी
पणजीः 17 वर्सा पिराये सकयल्ल्या चलयांच्या फिफा संवसारीक फुटबॉल सर्तीचे उपांत्यपूर्व आनी उपांत्य फेरयेच्यो मॅची फातोंड्डेच्या नेहरू स्टेडियमाचेर 11 ऑक्टोबरच्यान जातल्यो. हे सर्तीचो भारत येजमान आसा आनी प्राथमीक फेरयेच्यो मॅची भुवनेश्वर, नवी मुंबय आनी गोंयांत जातले. खेळ आनी युवा वेव्हार संचालक अजय गावडे हांणी ही म्हायती दिली.
हे संवसारीक सर्तीचें उक्तावण ओडिशाची राजधानी भुवनेश्वरांत जातलें. गोयांत बांबोळे, बाणावली, वास्को हांगच्या मैदानांनी सराव मॅची जातल्यो. विदेशी पंगडाच्या गोंयांतल्या राबित्याची सगली वेवस्था केल्या. चडांत चड भुरग्यांनी सर्तीतल्यो मॅची पळोवच्यो हे खातीर जायते उपक्रम चालीक लायतले अशें गावडे हांणी सांगलें.
2017 वर्सा 17 वर्सां पिरायेच्या चल्यांच्या संवसारीक सर्तीच्यो मॅची गोंयांत जाल्ल्यो. अदूंचे चलयाचे सर्ती खातीर फिफान आठ हायब्रीड मैदानां तयार करून दिल्यांत. 8 देशांचे पंगड उपांत्यपूर्व फेरयेंतल्यो मॅची खेळपाक गोंयांत येतले. फिफान सध्या मॅचींच्यो तिकेटी विकपाक सुरवात केल्या.. सर्तीच्या आयोजना खातीर सुमार 3 कोटी रुपये खर्च आयला अशी म्हायती गावडे हांणी दिली.
विद्यार्थ्यांक मॅची पळोवपा खातीर मैदानार हाडटले. 10 ऑक्टोबराक बांबोळे श्यामाप्रसाद मुखर्जी स्टेडियमाचेर सर्तीचें उक्तावण जातलें. 11, 12, 14, 15, 17 आनी 18 ऑक्टोबराक साजें 4.30 आनी रातयां 8 वरांचेर मॅची जातल्यो. 22 आनी 26 ऑक्टोबराक उपांत्य फेरेयच्यो मॅची जातल्यो अशें गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
