भांगरभूंय | प्रतिनिधी
वट्ट 118 मदल्या 95 विद्यालयांची सरस कामगिरी
पणजी : दर वर्सा प्रमाण अंदूं लेगीत शालान्त परिक्षेचो निकाल 92 टक्क्यां वयर लागला. शारांतल्या शाळां परस अंदूं गांवगिऱ्या वाठारांतल्या विद्यालयांची कामगिरी बरी जाल्या. विद्यालयांच्या शंभर टक्के निकालाचो विचार केलो, जाल्यार 80 टक्के विद्यालयां गांवगिऱ्या वाठारांतली आसात. अंदूं सरकारी आनी अनुदानीत मेळून 118 विद्यालयांचो निकाल 100 टक्के लागला. हातूंतलीं 95 विद्यालयां हीं गांवगिऱ्या वाठारांतलीं आसात.
गांवगिऱ्या वाठारांतल्या विद्यार्थ्यांची कामगिरी दर वर्सा सरस जावपाक लागल्या. गांवगिऱ्या वाठारांतले विद्यार्थी आयआयटी, बिट्स पिलानी सारक्या संस्थांनी प्रवेश मेळोवपाक लागल्यात. अंदूंच्या धावेच्या निकालाचेर नदर मारली जाल्यार गांवगिऱ्या वाठारांतल्या विद्यार्थ्यांची कामगिरी तुळेंत समाधानकारक जाल्या.
शंबर टक्के निकाल लागप हो विद्यालया खातीर मानाचो तुरो आसता. पिपल्स हायस्कूल (पणजी), सेंट मेरी, आल्मेदा हायस्कूल (फोंडें), न्यू गोवा हायस्कूल (म्हापशें), महिला नुतन (मडगांव) ह्या विद्यालयांचो निकाल सदांच उत्कृश्ट लागता. ह्या विद्यालयांतल्या विद्यार्थ्यांची कामगिरी कायम सरस आसता. अंदूं म्हापशें, पणजी, फोंडें, दिवचल, सांवड्डें, मडगांव, वास्को, कुडचडें ह्या शारांतल्या विद्यालयां परस गांवगिऱ्या वाठारांतल्या विद्यालयांचो निकाल 100 टक्के लागपाचें प्रमाण चड आसा.
बार्देस (4), दिवचल (14), काणकोण (7), मुरगांव (2), पेडणें (16), फोंडें (11), सत्तरी (10), केपें (4), साश्ट (11), सांगें (3), तिसवाडी (10) जाल्यार धारबांदोडें म्हालांतल्या 3 गांवगिऱ्या वाठारांतल्या विद्यालयांचो निकाल 100 टक्के लागला.
विजयानंद हायस्कूल (मयें), सरकारी हायस्कूल तारमाथा (सुर्ला), भुमिका हायस्कूल (केरी), विविधा हायस्कूल (न्हावेली), आयडियल हायस्कूल (पिळगांव), कमळेश्वर हायस्कूल (कोरगांव), हरमल पंचक्रोशी (हरमल) ह्या विद्यालयांचो निकाल 100 टक्के
लागला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
