भांगरभूंय | प्रतिनिधी
गोंय काँग्रेस प्रदेशाध्यक्ष अमित पाटकार हांची शिटकावणी
पणजी, प्रतिनिधी: खणी, कसिनो, ग्रामीण कल्याण आनी कोळश्याचेर सेस हाचेर सरकाराचे 10 हजार कोटी रुपया थकल्यात. ते वसूल करचे म्हूण आमी मुख्य सचिवांक निवेदन दिलां. जर हे पयशे वसूल करुंक नात जाल्यार काँग्रेस राज्यभर आंदोलन करतले, अशी शिटकावणी गोंय काँग्रेस प्रदेशाध्यक्ष अमित पाटकार हांणी दिल्या.
श्री. पाटकार हांणी पत्रकार परिशदेत विधानसभेचो सप्तकी नियाळ घेतलो. ताचे वांगडा दक्षीण गोंय काँग्रेस अध्यक्ष सावियो डिसिल्वा, उत्तर गोंय काँग्रेस अध्यक्ष वीरेन्द्र शिरोडकार आनी म्हणयारे उपेन्द्र देशप्रभू हाजीर आशिल्ले.
बारीक मनशांक कशें काबार करप हें कोणेंय भाजप सरकारा कडल्यान शिकचें. एका सामान्य मनशान हजार रुपयाचें लायटीचें बील फारीक करुंक ना जाल्यार ताचें लायट कनेक्शन तोडटात, पूण हेंच सरकार आपल्या उद्देजक इश्टां खातीर 10 हजार कोटी रुपयांचेर उदक सोडटात. गोंयांचेर 3600 कोटी रीण आसा. म्हणजें दरेका गोंयकारांचेर 2.40 लाख रीण जालें. पूण हे पयशे वसूल करपा वेळार सरकार दोळे धांपता, असो आरोप पाटकार हांणी केला. सरकारा कडल्यान लायटीचीं बिलां लेगीत थकल्यांत. वेवसायिक, उद्देगीक आनी सरकारी संस्थां कडल्यान अजून रु. 2214.74 कोटी वसुल करचे उरल्यात, अशें पाटकार हांणी सांगलें.
कसिनों कडल्यान रु. 349.89 कोटी वसूल करपाक सरकार अपेशी थारलां. बांबोळेंच्या एका फायव्ह स्टार हॉटेलान आपलो कसिनो चलोवपाक दिल्लो. तो सरकाराक 33 कोटी दिवपाचो आसा, पूण तो कसिनो ऑपरेटर गोंय सोडून गेलो आनी दुसऱ्यांक तो चलोवपाक दिला. ताचेर कारवाय करपाची गरज आसा, अशी मागणी पाटकार हांणी केल्या. गोंय ग्रामीण सुदारणा आनी कल्याण सेसाचे रु. 366 कोटी थकल्यात. हो आंकडो फक्त 2018 मेरेनचो. 2018 ते 2024 मेरेनचो डाटाच ना. सरकारान फाटल्या स वर्सांची मोलावणी करुंक ना. ती केल्यार हो आंकडो रु. 500 कोटी मेरेन पावता, असो दावो पाटकार हांणी केला.
जेन्ना भाजपा सरकार 2012 न सत्तेर आयलें तेन्ना मुख्यमंत्री मनोहर पर्रिकार हांणी 2013 त कोळशाच्या पदार्थाचेर ग्रीन सेस लायिल्लो. पूण 2014 त केंद्रात मोदी सरकार आयले उपरांत मोदी हांणी सांगलें की हो सेज 2 टक्क्यां वेल्यान 0.5 टक्के कर आनी ताचे आयकून पर्रिकार सरकारन तो 0.5 टक्के केलो. कोळश्याच्या सेसाचेर आतां मेरेन रु. 6500 कोटी थकल्यात. हांतूत व्हडले प्लेयर जशे की अडानी, जिंदाल आनी वेदांता हें शुल्क दिवपाचे आसात, असोय आरोप पाटकार हांणी केलो.
आमी मुखेल सचिवांक निवेदन सादर केला आनी मागलां की थकबाकीदारांचे कन्सेंट टु ऑपरेट रद्द करचें. तांचें लायटीचें आनी उदकाचें कनेक्शन तोडचें आनी हे 10 हजार कोटी वसूल करचे. नाजाल्यार काँग्रेस पुराय राज्यभर आंदोलन करतलें. कायदो सुवेस्थेचो प्रश्न उप्रासल्यार काँग्रेस जापसालदार आसची ना, अशी शिटकावणी पाटकार हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
