भांगरभूंय | प्रतिनिधी
तळें सावट असोसिएशनाच्या बांदाची दुरुस्ती, शेतां नांगरपाक सुरवात
भांगरभूंय । प्रतिनिधी
माशेलः बांदाचें दुरुस्तीकाम पुराय जाल्ल्यान सावट करमळीचे शेतकार शेतां कसपाक शकतात. इतलीं वर्सां तांकां शेतां कसपाक मेळूंक नाशिल्लीं. ताची भरपाय ते दोन पिकां घेवन करपाक शकतात, तेचवरी हेरांक रोजगाराच्यो संदी उपलब्ध करून दिवपाक शकतात, अशें गोंय पुनर्वसन मंडळाचे अध्यक्ष तशेंच कुमारजुव्यांचे आमदार राजेश फळदेसाय हांणी सांगलें.
तळें सावट असोसिएशनाच्या बांदाची दुरुस्ती आमदार फळदेसाय हांच्या फुडारपणा खातीर झुजां पांवड्यार हातांत घेतिल्ली. पावसाळ्या आदीं हें दुरुस्तीकाम पुराय जाल्ल्यान शेतकार आतां शेतां कसपाक शकतले. उदकास्रोत विभागाच्या माध्यमांतल्यान हें काम केलां. सुपीक जमनी वयल्या शेतांचें पुनरुज्जीवन करपाचें, तशेंच वाडट्या उदकाचे पातळी पासून असुरक्षीत वाठाराची राखण करपाचें आस्वासन आमदार फळदेसाय हांणी दिल्लें, तें तांणी पुराय केलें.
बांदाक खावटीं पडिल्ल्यान करमळीचीं शेतां उदका पोंदां गेल्लीं. ताका लागून आमी ह्या वाठारांत शेतां कसपाक शकले नात. आतां बांदाची पुनर्बांदणी केल्या. ताका लागून 10 वर्सां उपरांत शेतकार शेतां कसपाक सुरवात करतले, अशें शेतकार लक्ष्मण काणकोणकार हांणी सांगलें. शेतांत न्हंयेचें उदक घुशिल्लें आनी आतां आमदारान मजत केल्ल्यान शेतां कसपा खातीर आमी मुखार सरल्यात. आमी हेर शेतकारांक लेगीत शेत ओंपपा खातीर आपयतले, अशें काणकोणकार हांणी सांगलें.
शेतकारांनी आपले जमनीर शेतां कसचीं. वेंचणूक सोंपली आनी आमी कामां हातांत घेवपाक सुरवात केल्या. सुमार 10 वर्सां शेतकारांनी शेतां कसूंक नाशिल्लीं, पूण आतां आमी बांदाची दुरुस्ती केले उपरांत शेतां कसपाक मुखार सरल्यात. मुख्यमंत्री प्रमोद सावंत हे सदांच शेतकारांक शेतां कसचे खातीर उर्बा दितात. शेतकी मंत्री लेगीत आमकां शेतां कसचीं म्हूण उर्बा दितात, फुडारांतूय ते मजत करतले, अशें आमदार राजेश फळदेसाय हांणी सांगलें.
ह्या वाठारांत सुमार 30 शेतकार आसात. आपल्याक जाता तितली मजत करपाचें आपणें तांकां उतर दिलां. ती मजत ट्रॅक्टर आसूं, वा लागवडी खातीर हेर खर्च. शेतकारांनी आपल्या शेतांत उमेदीन शेत ओंपचें. आयज आमी तांकां उर्बा दिल्ल्यान ते भायर सरल्यात. आमकां हीं शेतां कसपाचीं आसात. तांकां सरकारा वतीन जी मजत जाय ती आमी दितले. तांचे मजती खातीर आपूण मुखार सरला. शेतां म्हत्वाची आशिल्ल्यान हेर शेतकार मुखार सरले जाल्यार आपल्याक अदीक खोस जातली. शेतकारांनी वर्सांक उण्यांत उणीं दोन पिकां घेवचीं, असो उलो फळदेसाय हांणी मारलो. मतदारसंघांत अशींच कामां जातलीं. हीं कामां प्राधान्यान करचे खातीर पुराय आदार करतलों, अशें उतर उदकास्रोत मंत्र्यान दिल्ल्याचें आमदार फळदेसाय हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
