भांगरभूंय | प्रतिनिधी
मडगांव: दिवाळेच्या उत्सवाचे फाटभुंयेर दक्षीण गोंयांतले खावपाचे पदार्थ तयार करपी युनिटाची अन्न आनी वखदां खातें तपासणी करता. हे तपासणेंत दवर्ले मोटारींत दवरिल्ली 78 हजार रुपयांची मिठाय जप्त करून नश्ट केली. तशेंच चार युनिटाची तपासणी करून एका युनिटाक नितळसाण दवरूंक नाशिल्ल्यान दंड दिलो. तशेंच नुव्यां 32 हजारांचो मावा जप्त केलो.
अन्न आनी वखदां खात्याचे अधिकारी उत्सवाच्या काळांत बरे खावपाचे पदार्थ नागरिकांक मेळचे हे खातीर पदार्थ तयार करपी युनिटाची तपासणी करतात. बिरेस्तारा दवर्ले थळाव्या मिठाय उत्पादकांक मावाची पुरवण करपी वाहनाची तपासणी केली तेन्ना दुदाच्या उत्पादनां खातीर गरजेचो योग्य सांठो करून दवरपाची वेवस्था दिसून आयली ना. कलाकंद, बर्फी आनी हेर मिठायेच्या पोतयांचेर गरजेची म्हायती नाशिल्ली.
अन्न आनी वखदां खात्यान कलाकंदाच्याे दरेकी 10 किलाच्याे पांच पोतयो, बर्फीच्यो दरेकी 10 किलाच्यो सात पोतयो हाचे सयत हेर मिठायेच्याे पांच किलाच्यो स पोतयो असो 78 हजार रुपयांचो म्हाल जप्त करून नश्ट केलो.
ह्या मिठायेच्या पोतयांचेर काळाभायऱ्यो तारखो आशिल्ल्यो. उल्लेख केल्ल्या एफएसएसएआय परवानो क्रमांक निश्क्रीय आशिल्ल्याचेंय दिसून आयिल्लें. तशेंच नितळसाण आनी नितळसाणे विशींची परिस्थिती तपासपा खातीर चार खावपाचे पदार्थ उत्पादन युनिट्सांची तपासणी केली. ह्या वेळार तपासणे खातीर नमुने घेतले. एके सुवातेर नितळ नाशिल्ले सुवातेर काम सुरू आशिल्ल्यान त्या युनिटाक पांच हजारांचो दंड दिलो.
उपरांत नुवें वाठारांतल्या उत्पादन युनिटाची तपासणी केली. ह्या वेळार योग्य लेबल्स नाशिल्ल्या, काळाभायरी तारीख आशिल्ल्या सुमार 32 हजार रुपया मोलाचो 10 कील मावा जप्त करून नश्ट केलो. हे कारवायेंत अन्न आनी वखदां खात्याचे अधिकारी संज्योत कुडाळकर, प्रिया देसाय, झेनिया रोझारिओ, माधव कवळेंकार, प्रदीक्षा चोपडेंकार, स्नेहा नायक, अमरदीप गावडे आनी गौरेश गांवकार हांणी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
