भांगरभूंय | प्रतिनिधी
दर चार वर्सांनी २९ फेब्रुवारी ही तारीख कित्याक येता हाचो केन्ना विचार केला? हाचे फाटल्यान कितें विज्ञान वा कितेंय तर्क आसा? हाचे फाटलें नेमकें कारण म्हळ्यार २९ ही तारीख दर ४ वर्सांनी फेब्रुवारींत येता. जाका लागून आमचें कॅलेंडर वर्स सौर वर्सा कडेन जुळटा. आपले सुर्यमाळयेंतले म्हत्वाचे गजालींक लागून दर चार वर्सांनी ‘लीप इयर’ गरजेचें.
अशें म्हणटात, पृथ्वीक सुर्या भोंवतणी प्रदक्षिणा काडपा खातीर ३६५ दीस लागतात. मात हें पुराय सत न्हय. पृथ्वीक सुर्याभोंवतणी एक प्रदक्षीणा पुराय करपा खातीर ३६५ दीस आनी ६ वरां लागतात. चार वर्सांचीं स वरां एक केल्यार तीं २४ वरां म्हळ्यार एक पुराय दीस जाता. हो वेळ समायोजीत करपाक लीप इयर गरजेचें. कांय शेकड्यां आदीं फेब्रुवारी म्हयनोय ३० दिसांचोच आसलो. मात रोमन सम्राट सीझर ऑगस्टसच्या अहंकाराक लागून तो २८ दिसांचो जालो.
काणी फेब्रुवारी म्हयन्याची
फेब्रुवारी म्हयनो सगळ्यांत ल्हान म्हयनो कित्याक थारलो? हें जाणून घेवपाक इतिहासाचेर नदर भोंवडावची पडटली. येशू ख्रिस्ताच्या जल्माच्या ४६ वर्सां आदीं, रोमन सम्राट ज्युलियस सीझरन हांणी नवे गणनेचेर आदारून नवो कॅलेंडर तयार केलो. ह्या कॅलेंडरांत १२ म्हयने आशिल्ले. ज्युलियस सीझराचो खून इ.स.पूर्व ४४ त जालो. ताका मान म्हणून कॅलँडरच्या सातव्या म्हयन्यांचें नांव जुलय दवरलें.
जुलय म्हयन्यांत ३१ दीस आसताले. ज्युलियस सीझर हांचे उपरांत सीझर ऑगस्टस सम्राट जालो. आठवो म्हयनो ऑगस्ट हो तांच्या नांवाचेर दवरला.
आता ज्युलियस सीझरच्या नांवाचेर आशिल्लो जुलय म्हयनो ३१ दिसांचो आशिल्लो, मात तांच्या नांवाचेर दवरिल्लो ऑगस्ट म्हयनो फकत २९ दिसांचो आशिल्लो हें पळोवन ऑगस्टसाक राग आयलो. तांचो अहंकार दुखवलो. ऑगस्टसान ऑगस्टाक जुलयच्या वांगडचो करपाचें थारायलें. आनी कॅलेंडर बदल्लो. अशे तरेन ऑगस्ट म्हयन्यांत ३१ दीस केले आनी फेब्रुवारींत २८ दीस जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
