भांगरभूंय | प्रतिनिधी
पणजी, प्रतिनिधी : गोंयांत जावपी ५५ व्या भारतीय आंतरराष्ट्रीय चित्रपट महोत्सवाच्या आंतरराष्ट्रीय चित्रपट ह्या विभागांत चित्रपट प्रदर्शीत करपा खातीर प्रवेश प्रक्रिया सुरू जाल्या. हे खातीर अर्ज करपाची निमाणी तारीख ३१ ऑगस्ट आशिल्ल्याची म्हायती इफ्फीचे आयोजक राष्ट्रीय चित्रपट विकास महामंडळान (एनएफडीसी) दिल्या. राज्यांत २० ते २८ नोव्हेंबर मजगतीं ५५ व्या इफ्फीचें आयोजन जातलें.
आंतरराष्ट्रीय विभागांत अर्ज करपी सगळ्या चित्रपटांक इंग्लीश सब टायटल आसप गरजेचें. हे चित्रपट १ सप्टेंबर २०२३ ते ३१ ऑगस्ट २०२४ मजगतीं पुराय केल्ले आसचे वा ह्या काळांत सेंसर बोर्डाचें प्रमाणपत्र ताका मेळिल्लें आसप गरजेचें. ह्या विभागांतले सगळे चित्रपट हे फीचर फिल्म आनी उण्यात उणे ७० मिनिटांच्या काळाचे आसप गरजेचें. तशेंच विदेशी चित्रपट भारतांत पयलींच प्रदर्शीत (प्रीमियर) जावप गरजेचें.
ह्या विभागांतल्या चित्रपटाक इफ्फींत मानाचो भांगराचो मोर पुरस्कार आनी ४० लाख रुपयांचें इनाम ह्या विभागांतल्या चित्रपटांक दिता. विभागांत १२ विदेशी जाल्यार ३ भारतीय चित्रपट दाखयतात. विदेशी चित्रपटांची निवड नामनेचे ज्युरी जाल्यार ३ भारतीय चित्रपटांची निवड इंडियन पॅनोरमा विभागाचे ज्युरी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
