भांगरभूंय | प्रतिनिधी
पणजी, प्रतिनिधी : सरकारी छापखान्यान फाटल्या ३ वर्सांत एकूय सरकारी राजपत्र वा अधिसुचोवणी कोंकणींतल्या छापूंक ना. खात्यां कडल्यान प्रस्तावूच येवंक नाशिल्ल्यान कोंकणींतल्यान छापप जावंक ना, अशी लेखी जाप छापणावळ मंत्री रोहन खंवटे हांणी दिल्या.
दिवचलचे आमदार डॉ. चंद्रकांत शेट्ये हांच्या लेखी प्रस्नाक मंत्री खंवटे हांणी ही लेखी जाप दिल्या.
राज्यांत राजभास कायद्याची कार्यवाही सुरू जाल्या. राजभास कायद्या प्रमाण देवनागरी कोंकणी ही राजभास आसा. तशेंच शासकी वेव्हारांत मराठीचो वापर करपाची मेकळीक आसा. सरकारी राजपत्रां तशेंस खात्यांचीं पुस्तकां कोंकणींतल्यान छापपाक सुरवात जातली, अशें वर्सा पयलीं मुख्यमंत्र्यांनी जाहीर केल्लें. आजून मेरेन सरकारी अधिसूचोवणी तशेंच राजपत्राची छपाई कोंकणी तशेंच मराठींतल्यान सुरू जावंक ना. एकाय खात्या कडल्यान तसो प्रस्ताव येवंक ना, अशें छापणावळ खात्याच्या मंत्र्यांनी स्पश्ट केलां.
सरकारी छापखान्यांत सरकारी पुस्तकां, नेमाळीं, सरकारी राजपत्रां मेळोन वट्ट १४८२ प्रकाशनां विकपा खातीर आसात. हीं सगळीं प्रकाशनां इंग्लिशींतल्यान आसात. सरकारी खातीं जो मजकुर छापपाक दिता, तो ते भाशेंतल्यान छापून दिवपाचें काम छापणावळ खातें करता.
राज्यांत राजभास कायद्याची कार्यवाही नेटान सुरू आसा. कार्यालयांचे बोर्ड कोंकणींतल्यान लावपा सयत गांवांची नांवां कोंकणींतल्यान करपाची प्रक्रीया सुरू आसा. सरकारी कार्यावळींच्यो आमंत्रण पत्रिका इंग्लीश, हिंदी सयत मराठी आनी कोंकणींतल्यान छापपाक सुरवात जाल्या, अशी म्हायती राजभास मंत्री ह्या नात्यान डॉ. प्रमोद सावंत हांणी एका प्रस्नाचेर दिल्या. सरकारी राजपत्र तशेंच अधिसुचोवण्यो कोंकणींतल्यान छापपाची प्रक्रीया मात आजून सुरू जावंक ना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
