भांगरभूंय | प्रतिनिधी
पणजी : राखीव जागांची तजवीज करून साहाय्यक शिक्षकांची ३३ पदां भरपा खातीरचो प्रस्ताव शिक्षण खात्या वरवीं कर्मचारी भरती आयोगाक परतून सादर जातलो. डिसेंबराचे सुरवातेक हो प्रस्ताव सादर जातलो, अशी म्हायती शिक्षण संचालक शैलेश झिंगडे हांणी दिली.
७ मार्च २०२४ ह्या दिसा सहाय्यक शिक्षकांचीं ३३ पदां भरपा खातीर जायरात जारी जाल्ली. राखीवतेची तजवीज नाशिल्ल्यान २६ मार्चाक आयोगान ही जायरात फांटी घेतली. नेमा प्रमाण एससी, एसटी, ओबीसी तशेंच हेर गटां खातीर राखीवतेची तजवीज करचीच पडटा. ही करुक नाशिल्ल्या कारणान जायरात फांटी घेवची पडली. हाचे उपरांत कर्मचारी भरती आयोगा वरवीं नोकर भरतीची जायरात जारी जावंक ना.
पूजा नायक, दीपश्री सावंत आनी हेरांक सरकारी नोकरे खातीर पयशे घेवपाच्या आरोपा खाला अटक जाल्या. नोकरे खातीर पयशे घेवपाच्या प्रकरणाक लागून सरकारी नोकर भरती परतून चर्चेंत आयल्या. नोकरी दिवपाचें हांयस दाखोवन तोपी घालपाचे प्रकार दर दिसा उक्ते जायत आसा. नोकरे खातीर पयशे दिवपाचे प्रकार बंद जावपा खातीर ह्यान फुडें कर्मचार्यांची भरती आयोगा वरवीं जातली, अशें मुख्यमंत्री डॉ. प्रमोद सावंत हांणी स्पश्ट केलां. आयोगान लेगीत नोकर भरती खातीरची तयारी सुरू केल्या.
कर्मचारी भरती आयोग कायदो फाटल्या सरकाराच्या काळांत जाल्लो. आयोगाचे अध्यक्ष तशेंच वांगड्यांची नेमणूक जावन २०२३ सावन आयोगाचे काम सुरू जालें. आतां मेरेन आयोगा वरवीं कर्मचारी भरतीच्यो तीन जायराती जारी जाल्यात. तिना मदली एक जायरात आयोगान फाटी घेतल्या. २९ डिसेंबर २०२३ दिसा आयोगान भरतीची पयली जायरात जारी केली. दुसरी जायरात १५ जानेवारी २०२४ दिसा सरकारी शाळांनी ३६ शिक्षकांची पदां भरपा खातीर जारी जाली. तिसरी जायरात ७ मार्च २०२४ दिसा साहाय्यक शिक्षकांचीं ३३ पदां भरपा खातीर जारी जाली. शिक्षण खात्यान राखीवतेची तजवीज करूंक नाशिल्ल्यान ही जायरात आयोगान फांटी घेतली. २६ मार्च २०२४ दिसा ही जायरात फाटीं घेतली. हाचे उपरांत नोकर भरती खातीर जायरात जारी जावंक ना.
मजगतीं विवीध खात्यांनी कंत्राटी पद्दतीन नोकर भरती करपाची प्रक्रीया सुरू केल्या. आतां आयोगा वरवीं नोकरभरतीच्यो ज्यो जायराती जारी जातल्यो तातूंत शिक्षक भरती खातीरच्यो बर्योच जायराती आसतल्यो, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
