भांगरभूंय | प्रतिनिधी
पणजी, बातमीदार: शिगमोत्सवाचो वर्सुकी सुवाळो २६ मार्च ते ८ एप्रील मजगतीं जातलो. ह्या काळांत फोंडें, कळंगूटे, सांखळे, वाळपय, पर्वरी, दिवचले, काणकोणां, पेडणें, वास्को, शिरोड्यां, कुडचड्यां, केंपें, धारबांदोडें, मडगांवां, म्हापशें, सांग्यार आनी कुंकळ्ळे चित्ररथ मिरवणूक जातली.
शिगमोत्सव शोभायात्रा जंय सुरू जाता तें दरेक स्थळ वेगळी परंपरा आनी रितीची वळख घडयता. राजधानी पणजे रोमटांमेळ, घोडेमोडणी, धनगर नाच, गोफ, मोरुलो ह्या परंपरीक नाचां सयत व्हड चित्ररथ मिरवणूक जाता. राकेसां आड देवांच्या जैतिवंत झुजांची झलक तांचे वरवीं पळोवपाक मेळटा. रामायण आनी महाभारता पसून पौराणीक दृश्यांचेर हे चित्ररथ सजिल्ले आसतात.
विंगड विंगड सांस्कृतीक भेस धारण करून तरणाटीं तशेंच ल्हान भुरगीं, बायलो सुंदर भांगरां शिंगरां घालून व्हडा उमेदीन हे मिरवणुकेंत वांटेकार जातात. धोलाच्या तालार एक उत्सवी वातावरण निर्माण जाता. शिगमोत्सवाचो दरेक घटक गोंयचे संस्कृतायेची आनी परंपरेची झलक दिता. पर्यटकांक थळाव्या लोकां कडेन उलोवपाक, समृद्ध सांस्कृतीक उत्सवांचे साक्षीदार जावपाक आनी गोंयां विशीं आनीक म्हायती मेळोवपाची संद मेळटा.
शिगमोत्सव चित्ररथ वेळापत्रक
फोंडें : २६ मार्च
कळंगुटे : २७ मार्च
सांखळे : २८ मार्च
दिवचल : २९ मार्च
पणजे : ३० मार्च
पर्वरे : ३१ मार्च
पेडणें : १ एप्रील
काणकोणां : २ एप्रील
वास्को : ३ एप्रील
शिरोडें/ कुडचडें: ४ एप्रील
केपें / धारबांदोड्यां : ५ एप्रील
मडगांव : ६ एप्रील
म्हापशें/ सांगें: ७ एप्रील
कुंक्कळी/ वाळपय: ८ एप्रील
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
