भांगरभूंय | प्रतिनिधी
सोमारा पावसाचो येलो ऍलर्ट
पणजी : सकाळीं पावस शिरशिरले उपरांत दनपारां पावसान विसव घेतला आसलो तरी सगळ्याक दमट हवामान आशिल्लें. आयतारा आनी सोमारा हवामान खात्यान पावस पडपाचो अदमास उक्तायतानाच येलो ऍलर्ट जारी केला. फाटल्या २४ वरांत दाबोळी आनी मुरगांव सुमार २ इंच पावसाची नोंद जाल्या. सगळ्याक पावस पडला आसलो तरी दक्षीण गोंयांत पावसाचें प्रमाण चड आसा. फाटले २४ वरांत राज्यात सरासरी २२.४ मिमी (सुमार १ इंच) पावसाची नोंद जाल्या.
केरळांत आजून मॉन्सून पावूंक नासलो तरी राज्यांत पावस शिरशिरता. मॉन्सून केरळांत २६ मेयाक पावतलो असो अदमास आसा. शेनवार सावन आशिल्ले दमट हवामान आयतारा लेगीत आसलें.
फाटल्या २४ वरांत नोंद दाबोळी ५२ मिमी (२ इंचा परस चड), मुरगांव ४२ मीमी, मडगांव ३६ मिमी पावसाची नोंद जाल्या. तापमान चडिल्लें आसलें तरी पावसाक लागून दमट जाल्या.
१ मार्च २०२६ उपरांत आतां मेरेन केप्यां सगळ्यांत चड ११६ मिमी (साडेचार इंच) पावसाची नोंद जाल्या. हाचे उपरांत मडगांव, दाबोळी आनी सांग्यार पावस पडला.
सुवात – २४ वरां पावस – १ मार्च उपरांतचो पावस
म्हापशं – ३ मिमी – १६.५ मिमी
पणजी – १४.२ मिमी – ३५.८ मिमी
सांखळे – ८.८ मिमी – ३९.४ मिमी
काणकोण – ७.२ मिमी – ६४.८ मिमी
दाबोळी – ५२ मिमी – ८२.६ मिमी
मडगांव – ३६ मिमी- १०१.८ मिमी
मुरगांव – ४२.८ मिमी – ५८ मिमी
केपें …… ११६.८मिमी
सांगें …… ८० मिमी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
