भांगरभूंय | प्रतिनिधी
एकठांय येवन एके दिकेन यत्न करपाची गरजः भलायकी संचालक
पणजीः एचआयव्ही, एड्स हें दुयेंस वर्स २०३० मेरेन पुराय काबार करपाची मोख गोंय भलायकी सेवा संचालनालयान दवरल्या. ह्या दुयेंसा आड एकठांय येवन हे दिकेन काम करपाक आमी लक्ष केंद्रीत केलां. लोकांक शिक्षीत करून तांचे मदीं जागृताय निर्माण करून एडस विशींचो भेदभाव आनी भंय आमकां सोंपोवपाक जाय, असो उलो भलायकी सेवा संचालक वंदना धुमे हांणी मारलो.
पणजे गोंय एड्स नियंत्रण सोसायटी आनी एड्स हेल्थकॅअर फेडरेशन (एएचएफ) हे संस्थेच्या जोडपालवान आयज संवसारीक एड्स दीस मनयलो. ह्या वेळार मुखेल सोयरी म्हणून डॉ. वंदना धुमे उलयताली. एएचएफचे ब्रँड एम्बसेडर प्रिंस मानवेंन्द्र सिंह गोहील, एएचएफचे राष्ट्रीय संचालक डॉ. व्ही सॅम प्रसाद आनी हेर मानेस्त हाजीर आशिल्ले. ‘एड्स दुयेंतीं मदीं जावपी भेदभाव बंद करपा खातीर तुमचे हक्क जाणून घेयात’ ही अंदूंचे कार्यवळीची संकल्पना आशिल्ली.
गोंय राज्यांत भलायकी मळार एड्स नियंत्रणा खातीर बरी कामगिरी करपी मुरगांव बंदर प्राधिकरणा हॉस्पिटलाचे मुखेल वैजकी अधिकारी डॉ. रवीकृष्णन, सांखळे समुदायीक भलायकी केंद्राचे वैजकी अधिकारी डॉ. अतुल पै, धाराबांदोडें मुळाव्या भलायकी केंद्राचे डॉ. संदेश मडकयकार, बाळ्ळी केंद्राची डॉ. विनिता डायस, घनश्याम कामत हॉस्पिटलाचे डॉ. गोविंद कामत, इसआय हाॅस्पिटल मडगांवची डॉ. रश्मी पिरामल हांचो भोवमान जालो.
एड्स दुयेतींचे जिणेंत बदल घडोवन हाडपा खातीर यत्न करपी भलायकी कर्मचारी, वावुरपी, संघटना हांची तोखणाय करतना डॉ. धुमे हांणी सांगलें, एचआयव्ही दुयेंसा विशीं जागृताय करप, जांकां कोणाक हो व्हायरस आसा तांकां तेको दिवप आनी जांकां ह्या दुयेंसाक लागून मरण आयलां तांच्या कुटुंबाक आदर दिवप हो संवसारीक एड्स दिसाचो हेत जावन आसा.
जे एड्स दुयेंती आसात तांचे हक्क सांबाळून दवरपाक आमी एकठांय येवन वावरप ही ह्या वर्साची संकल्पना. ती हक्काची वाट धरात हो उगडास करून दिता. जर आमचे विचार एकठांय आयले आनी एके दिकेन आमी लक्ष केंद्रीत केलें जाल्यार एड्स हो भलायके खातीरचो धोको आमी २०३० मेरेन पुराय सोंपोवपाक शकतात, अशें धुमे हांणी सांगलें.
समुदाय, राष्ट्र आनी खंड हांकां एड्साचेर उपचार आनी सेवा मेळटा हे निश्चीत करपाक आमी एकठांय रावप गरजेचें. एचआयव्ही, एड्स आड शिक्षण हें घटमूट हत्यार जावन आसा. फक्त जागृताय करूनच ह्या दुयेंसा विशींचो गैरसमज पयस जातलो. गैरसमज आनी भेदभावांक लागूनच लोक तपासपाक आनी उपचार घेवपाक सोदीनात. आमी हे विशीं उक्ती चर्चा आनी सगळ्यांक आस्पावन घेवपी धोरणाचें समर्थन करपाक जाय, अशें धुमे हांणी सांगलें.
विवीध संघटणां सयत गोंय एड्साचेर नियंत्रण दवरपा खातीर बरें काम करता तें पळोवन खोस भोगता, अशे प्रिंस मानवेंद्र सिंह गोहील हांणी म्हणलें. एक समलिंगी व्यक्ती म्हूण म्हाका कळून आयलां की जे लैंगीक अल्पसंख्याक समुदाय आसात, तांचे भितर एड्स दुयेंसाचो धोको चड आसा. देखून लोकांनी सुरक्षीत लैंगीक संबंधा खातीर उपाय येवजण करप गरजेचें, अशेंय गोहील हांणी सांगलें.
गोंय एड्स नियंत्रण सोसायटीक लागून एड्स नियंत्रणा बाबतींत गोंय राज्य भारतांतलें पयले राज्य जावन आसा आनी ही एक व्हडली उपलब्धी आसा. वेळावेळार केल्ल्या हस्तक्षेपांक लागून गोंय हें पुराय देशां खातीर आदर्श राज्य जावन उरतलें, अशें डॉ. प्रसाद हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
