भांगरभूंय | प्रतिनिधी
पणजी, बातमीदार : फाटल्या कांय वर्सां सावन विदेशांत वचून शिक्षण घेवपी विद्यार्थ्यांचो आंकडो वाडला. तशेंच राज्यांतले तरणाटे विदेशांत वचून काम करपाक प्राधान्य दितात. अश्याच कांय कारणांक लागून राज्यांत पासपोर्ट घेवप्यांच्या आंकड्यांत वाड जाल्या.
गोंयांत फाटल्या पांच वर्सांच्या काळांत म्हळ्यार २०१९ ते २०२३ ह्या वर्सा वट्ट २ लाख २० हजार ४२ पासपोर्ट गोंय पासपोर्ट कार्यालयांतल्यान जारी केल्यात. राज्यांत पासपोर्ट घेवप्यांचो आंकडो बरोच वाडला. फाटल्या पांच वर्सांचे तुळेंत २०२३ वर्सा सगळ्यांत चड पासपोर्ट जारी केल्यात. हातूंत तरणाट्यांचो आंकडो चड आशिल्ल्याची म्हायती मेळ्ळ्या.
२०१९ वर्सा गोंय पासपोर्ट कार्यालयांतल्यान वट्ट ५१ हजार ३५२ जाणांनी पासपोर्ट मेळयल्ले. उपरांत गोंयांत तशेंच पुराय देशांत कोवीड महामारी पातळ्ळी. ह्या काळांत पोसपोर्ट घेवप्यांचो आंकडो बरोच उणो जालो. २०२० त २६ हजार ४८६ लोकांनी पासपोर्ट मेळयले. २०२१ वर्सा ३२ हजार २६८ जाणांनी, जाल्यार २०२२ वर्सा कोविडाचो प्रभाव उणो जाल्ल्यान हो आंकडो परत वाडून ५१ हजार २५ इतलो जाल्लो. जाल्यार २०२३ त तातूंत ५ हजार ८८४ न वाड जाली आनी हो आंकडो ५६,९१० चेर पावलो.
फाटल्या पांच वर्सांच्या काळांत वट्ट १० हजार १९ जाणांनी भारतीय पासपोर्ट परत करून पुर्तुगीज नागरीकत्व स्विकारलें. पोर्तुगालांत जल्माची नोंदणी आशिल्ल्यान २०२३ वर्सा वट्ट १२८ जाणांचे पासपोर्ट रद्द केल्यात, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
