१५ ऑगस्टा पयलीं तुयें हॉस्पिटल सुरू करात, नाजाल्यार खर आंदोलन

भांगरभूंय | प्रतिनिधी

तुयें आनी पेडणें नागरीक समितीन बसकेंत घेतलो निर्णय

पेडणें, प्रतिनिधी: तुयें हॉस्पिटल प्रकल्प १५ ऑगस्टा पयलीं पुरायेन चालीक लावंक ना जाल्यार १५ सप्टेंबर सावन हाचे आड खर आंदोलन करपाचो निर्णय आयतारा तुयें नागरीक समिती आनी पेडणें नागरीक समितीन घेतिल्ले जोड बसकेंत घेतलो. तशेंच ह्या विशयाचेर येवपी दोन-तीन दिसांनी मुख्यमंत्री आनी भलायकी मंत्र्यांक तुयें हॉस्पिटल कृती समिती वतीन निवेदन सादर करतले. हाका लागून हे बसके उपरांत एक कृती समिती स्थापन केली.

हे बसकेंत आदले मुख्यमंत्री प्रा. लक्ष्मीकांत पार्सेकार, आपचे गोवा प्रदेश अध्यक्ष ऍड. अमित पालेकार, कार्यकारी अध्यक्ष वाल्मिकी नायक, मांद्रें सरपंच प्रशांत नायक, आदले सरपंच ऍड. अमित सावंत, बाबी बागकार, भारत बागकार, प्रमेश मयेंकार, तुयें पंच निलेश कांदोळकार, देवेंद्र प्रभुदेसाय, ऍड. प्रसाद शहापूरकार, ऍड. जितेंद्र गांवकार, भास्कर नारूळकार, व्यंकटेश नायक, देवेंद्र प्रभुदेसाय, जुझे लोबो, अमोल रावत, सुहास नायक, अमोल रावत, चिंतामणी पोळजी, विलासिनी नायक, जगन्नाथ पार्सेकार, डॉ. मेलवीन डिसोझा, राजमोहन शेट्ये, नारायण रेडकार, डायगो मेंडोझा, डॅनीयल डी सोझा, स्नेहा नायक, शालन साळगांवकार हांणी ह्या वेळार विचार मांडले.

७७ कोटी परस चड खर्च करून उबारिल्ल्या आनी गोंय वैजकी म्हाविद्यालया कडेन जोडिल्लो तुयें हॉस्पिटल प्रकल्प सुरू जावचो. ताका लागून पेडणेंकारांनी एकठांय येवन काम करपाची गरज ह्या वेळार चडश्यांनी उक्तायली. ह्यान फुडें पेडणेकारांक फकांडांनी घेवचें न्हय अशीय शिटकावणीय तांणी दिली.
प्रा. लक्ष्मीकांत पार्सेकार हांणी, फकत पेडणें म्हालांतल्या सामान्य नागरिकांची भलायकी दोळ्यां मुखार दवरून हो प्रकल्प चालीक लायलो. मात फाटलीं कितलींशीच वर्सां जालीं तो तसोच पडून आसा. हे सगळें गंभीरपणान घेवपाची गरज आसा. आपल्याक हातूंत राजकारण करपाचें ना. आपूण हो प्रकल्प सुरू जाय मेरेन नागरिकां सयत रावतलों. ताका लागून आमी एकवटान हो प्रकल्प पुराय करपाचो संकल्प करुया अशें तांणी म्हणलें.
वाल्मिकी नायक हांणी मुख्यमंत्री डॉ. प्रमोद सावंत हांणी राजकी द्वेश कुशीक दवरून हो प्रकल्प बेगोबेग सुरू करचो. ना जाल्यार फुडल्या परिणामांक तयार रावपाची शिटकावणी दिली.
अमित पालेकार हांणी गोंयचे जायते प्रकल्प शोबेच्यो बावल्यो थारतात. सद्या मुख्यमंत्री आनी भलायकी मंत्र्या मदीं चालू आशिल्ल्या कोल्ड वॉराक लागून गोंयकारांची भलायकी धोक्यांत आसा. भलायकी मंत्र्यांक धडो शिकोवपा खातीर अर्थ मंत्री पद सांबाळपी मुख्यमंत्र्यानी तांच्यो फायली आडावन दवरल्या. मात तुयें हॉस्पिटल प्रकल्पा विशीं जो मेरेन गॅरंटी मेळना तो मेरेन हो लढो आमी चालूच दवरुया. ना जाल्यार तसो प्रसंग आयल्यार विमानतळ, हायवे बंद बंद उडयतले अशेंय तांणी सांगलें.