भांगरभूंय | प्रतिनिधी
पणजी, बातमीदार ः म्हादय ही फक्त गोंयकारां खातीर हें जाहीर करचें, कोमुनिदाद जाग्यां वयल्यो झोपडपट्ट्यो मोडप आनी पोगो विधेयक स्विकारप ह्यो तीन अटी मान्य जाल्यार आरजी पक्ष इंडी आघाडे कडेन जागा वाटपा विशीं चर्चा करपाक तयार आसा, अशी म्हायती पक्षाचे मुखेली मनोज परब हांणी दिली. सोमारा पणजे जाल्ले पत्रकार परिशदेंत ते उलयताले. ह्या वेळार आमदार विरेश बोरकार हाजीर आशिल्ले. ह्यो अटी मान्य करपा खातीर 20 एप्रील मेरेन मुजत दिल्या अशें परब हांणी सांगलें.
काँग्रेस पक्ष आमचेर टिका करता. पूण इंडी आघाडी विशीं चर्चा करपाक नोव्हेंबर म्हयन्यांतच आमकां आपोवपाचें आवाहन आमी केल्लें. पूण तांणी ताचे कडेन आडनदर केली. उपरांत आमी डिसेंबरांत आमच्या उमेदवारांची घोशणा केली. आमी अजूनय उलोवपाक तयार आसात. ते खातीर काँग्रेसीच्या राष्ट्रीय फुडाऱ्यांनी दिल्लींत पत्रकार परिशद घेवन म्हादय फक्त गोंयकारां खातीर अशें जाहीर करचें. तशेंच कळसा भंडुरा प्रकल्प पुरायपणान रद्द करचो. काँग्रेसीच्या राष्ट्रीय घोशणापत्रांत ह्यो दोनूय गजाली आस्पावपाक जाय, अशें परब हांणी सांगलें.
तांणी सांगलें, फाटल्या कांय वर्सांत स्थलांतरित लोकांचो आंकडो गोंयांत वाडत आसा. हे लोक सरकारी वा कोमुनिदादीचे जमनीचेर बेकायदेशीर झोपडपट्ट्यांनी रावतात. काँग्रेसीन आपल्या राज्य घोशणापत्रांत सगळी बेकायदेशीर झोपडपट्टी मोडून उडोवपाचें उतर दिवचें. हाचे भायर काँग्रेसीन आरजीन तयार केल्लें पोगो विधेयक मान्य करपाचें उतर दिवचें वा तांणी ‘पर्सन ऑफ गोवन ओरिजिन’ हाची व्याख्या स्पश्ट करची. ह्यो तीन अटी मान्य केल्यार आमी जागा वाटपा विशीं चर्चा करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.