भांगरभूंय | प्रतिनिधी
नवी दिल्ली:
भारताचे भोंवडेर आशिल्ले अमेरिकेचे परराष्ट्र मंत्री मार्को रुबियो हांणी आयतारा सांगलें की, संघर्शमय ‘स्ट्रेट ऑफ होर्मुझ’ (होर्मुझ खाडी) विशीं फुडल्या कांय वरां भितर ‘बरी बातमी’ येवपाची शक्यताय आसा. नवी दिल्लींत परराष्ट्र मंत्री एस. जयशंकर हांचे वांगडा जाल्ल्या जोड पत्रकार परिशदेंत ते उलयताले. फाटल्या 48 वरां भितर ह्या प्रस्नाचेर तोडगो काडपा खातीर एका आराखड्याचेर विचार जाला, अशें रुबियो हांणी सांगलें.
डोनाल्ड ट्रम्प हांचो ‘ट्विट’
हाचे पयलीं अमेरिकेचे राष्ट्राध्यक्ष डोनाल्ड ट्रम्प हांणी ‘ट्रुथ सोशल’चेर उजवाडायिल्ल्या एका संदेसांत, अमेरिका आनी इराण मदीं झूज सोंपोवपा खातीर आनी होर्मुझ खाडी परतून उकती करपा खातीर एका कराराचेर एकमत जावपाची ओड लागल्या, अशी घोशणा केल्ली. फेब्रुवारीत अमेरिका आनी इझ्रायेलान इराणचेर घाल्ल्या घुरयेक लागून ही खाडी बंद जाल्ली, जाका लागून संवसारभर उर्जा संकट निर्माण जाल्लें.
युरेनियमच्या साठ्या वयल्यान वाद
‘द न्यू यॉर्क टायम्स’च्या एका अहवाला प्रमाण, इराण आपल्या लागीं आशिल्लो संवर्धित युरेनियमचा साठो कुशीक दवरपाक तयार जाला. पूण, इराणच्या एका वरीश्ठ सूत्रांन ‘रॉयटर्स’ कडेन उलयताना हो दावो न्हयकारला.
“अणू प्रस्न हो चालू प्राथमिक कराराचो वांटो न्हय, तर तो फुडल्या सुनावणेत हाताळ्ळो वचतलो. युरेनियम देशा भायर धाडपा विशीं कसलोच थराव जावंक ना,” अशें इराणच्या सूत्रांन सांगलें.
आंतरराष्ट्रीय अणू उर्जा संस्थेच्या (IAEA) अदमासा प्रमाण, इराण कडेन सध्या 60 टक्के शुद्धतेचो लागबागी 400 किलोग्राम संवर्धित युरेनियम साठो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
