भांगरभूंय | प्रतिनिधी
वाळपय, प्रतिनिधी : होंडा बस स्टॅण्ड सध्या घुंवळे वखदांचें केंद्र जालां. हांगा घुंवळे वखदांचो वेव्हार जाता, असो नागरिकांचो आरोप आसा. दोन दिसां पयलीं घुंवळे वखदां विरोधी पंगडान हांगा धाड घालून दोगांक अटक केल्ली, अशी म्हायती मेळ्ळ्या. नागरिकां मुखार दोगांक ह्या पंगडान फाटलाव करून ताब्यांत घेतिल्ले. मात हे विशींची कागाळ नोंद जावंक ना. तडजोड करून हें प्रकरण मिटयिल्ल्याचीय म्हायती मेळ्ळ्या. ताका लागून नागरिकांनी अजाप उक्तायलां. ही घडणूक सोमारा रातच्या सुमार इकरा वरांचेर घडिल्ली.
मजगतीं, होंडाच्या बस स्टॅण्डाचेर घुंवळे वखदांचो वेव्हार जाता अश्यो कागाळी फाटल्या कांय दिसां सावन लोक करतात. हाची दखल घेवन घुंवळे वखदां विरोधी पंगडान सोमारा रातच्या सुमार इकरा वरांचेर एके गाडयेंत हो वेव्हार सुरू आशिल्ले कडेन छापो घाल्लो. ह्या वेळार गाडयेंत आशिल्ले दोग जाण थंयच्या पळ्ळे. एकल्याक थंयच ताब्यांत घेतलो. दुसर्याचो फाटलाव करून ताका ताब्यांत घेतिल्लो. नागरिकांनी घडणुके सुवातेर व्हडा प्रमाणांत गर्दी केल्ली. मात हे विशीं कागाळ पुलिशेंत नोंद जावंक ना. ताब्यांत घेतिल्ल्या दोगां मदलो एकलो होंडा आनी दुसरो पिसुर्लेंचो. फाटल्या कांय दिसां सावन हे दोगूय तरणाटे घुंवळे वखदांचो वेव्हार करतात, असो आरोप नागरीक करताले. हाचे पयलीं तांतुंतल्या एकल्याक तीन खेपो असल्या आरोपा खाला पुलिसांनी ताब्यांत घेतिल्लो.
मजगतीं, दोगांक ताब्यांत घेतले उपरांत हे विशीं खोलायेन चवकशी करून मुखेल आरोप्यां मेरेन पुलिसांक सहज शक्य जावपाचें. मात घुंवळे वखदां विरोधी पंगडान हे विशींची कारवाय कित्याक करूंक ना असो प्रस्न थळावे उक्तायतात. खुबश्या लोकांनी हे विशी तिडक उक्तायल्या. नागरिकां मुखार छापो घालून घुंवळे वखदांचो वेव्हार करपी दोगां तरणाट्यांक ताब्यांत घेवन लेगीत कित्याक कारवाय करूंक ना, तें कळना, अशें एका नागरिकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
