भांगरभूंय | प्रतिनिधी
इंडियन सुपर लिगेंत काल दोन मॅची जाल्यो. पयले मॅचींत सध्याचो वस्ताद हैदराबाद एफसीन सेगीत दोन हारी घेतल्या उपरांत काल आदलो वस्ताद चेन्नयीयन एफसीक 3-1 अशा गोल फरकांनी हारोवन जैताची गाडी रुळाचेर हाडली.
जाल्यार दुसरे मॅचींत एटीके मोहन बगानान जैताची धांव कायम राखतना बळिश्ट बंगळुरू एफसीक 1-0 असो हारयलो.
हैदराबाद एफसी वतीन हालिचरण नार्जरी (65), चिंगलेसाना कोंशाम (74) आनी बदली खेळगडो बोर्जा हेरारा (85) हांणी गोल केले. हैदराबादाचें णवांतलें सवें जैत थारलें. ह्या जैता उपरांत 19 गुणां सयत तो गुणतकट्यांत दुसरे सुवातेर पावलो. दुसरे वटेन आठांतली चवथी मॅच हारपी चेन्नयीयन एफसी 10 गुणां सयत गुणतकट्यांत सातवे सुवातेर आसा.
रायट बॅक अजीताक मॅचींत दुसरें यॅल्लो कार्ड मेळिल्ल्यान ताका मैदान सोडचें पडलें आनी ताका लागून मॅचीच्या 71व्या मिनटा उपरांत चेन्नयीयन एफसीक 10 खेळगडे घेवन खेळचे पडले.
क्रोएशियाचो स्ट्रायकर पेटर स्लिस्कोविकान मॅचीच्या 78व्या मिनटाक चेन्नयीयन एफसी वतीन एकोडो गोल केलो.
आनीक एके मॅचींत एटीके मोहन बगानान बळिश्ट बंगळुरू एफसीक 1-0 असो हारयलो. मॅचींतलो एकोडो आनी म्हत्वाचो गोल दिमित्री पेट्राटोसान 66व्या मिनटाक केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
