भांगरभूंय | प्रतिनिधी
इंडीयन प्रिमीयर लिगेंत (आयपीएल) काल येजमान सनरायझर्स हैदराबादान सध्याचो वस्ताद चेन्नय सुपरकिंग्साक 6 विकेटींनी हारयलो. अभिषेक शर्मान आक्रमक बॅटींग केली जाल्यार एडन मार्करमान (50) सादूरतायेन खेळी करीत आपल्या पंगडाक घरच्या मैदानाचेर सेगीत दुसरें जैत मेळोवन दिलें.
ह्या जैता सयत हैदराबाद गुणतकट्यांत 5वे सुवातेर पावलो. जाल्यार चेन्नय तिसरे सुवातेर कायम आसा.
चेन्नय सुपरकिंग्सान दिल्लें 166 धांवड्यांचें आव्हान सनरायझर्सान 18.1 ओव्हरींनी 4 विकेटी व्हगडावन मेळयलें. सनरायझर्सान आक्रमक सुरवात केली. ओपनर अभिषेक शर्मान 12 बॉलांनी 37 धांवड्यो केल्यो. अभिषेकाक बाद करपाक दीपक चाहराक येस आयलें. पूण, तो मेरेन येजमान पंगड घटमूट स्थितींत पाविल्लो. उपरांत एडन मार्करमान अर्दो शेंकड्याची खेळी करून जैत मेळोवन दिवपाक हातभार लायलो.
चेन्नय सुपरकिंग्सा वतीन मोईन अलीन मॅचींत उमळशीक हाडली खरी. पूण, ताका आपल्या पंगडाक जैत मेळोवन दिवपाक जमलें ना. हैदराबादा वतीन ट्रॅव्हिस हेड (31), शाहबाज अहमद (18), हॅन्रीक क्लासेन (नाबाद 10) आनी नितीश रेड्डीन (नाबाद 14) जैत मेळोवन दिवपाक हातभार लायलो.
ते आदीं टॉस हारल्या उपरांत चेन्नय सुपरकिंग्सान पयलीं बॅटींग केली आनी निर्धारीत 20 ओव्हरींनी 5 विकेटी व्हगडावन 165 धांवड्यो केल्यो. अजिंक्य रहाणेन 35 आनी ऋतुराज गायकवाडान 26 धांवड्यांचें योगदान दिलें. पूण, तांची स्ट्रायक सामकी उणी आशिल्ली. अशे फाटभुंयेर मदले फळयेंतलो बॅट्समन शिवम दुबेन आक्रमक बॅटींग करून धांवगती वाडोवपाचो यत्न केलो. ताणें 24 बॉलांनी 45 धांवड्यांची खेळी केली. तो बाद जाल्या उपरांत चेन्नयची धांवसंख्या बरीच उणी जाली. सकयले सुवाते वयल्या बॅट्समनांक व्हड शॉर्ट खेळपाक अपेस आयलें. निमाण्या 42 बॉलांनी फकत 50 धांवड्यो दिवन हैदराबादान 3 विकेटी घेतल्यो.
15 ओव्हरी सोंप मेरेन चेन्नय सुपरकिंग्सान 4 विकेटी व्हगडावन 127 धांवड्यो आशिल्ल्यो. निमाण्या पांच ओव्हरींनी हैदराबादाच्या बॉलरांनी तांचेर अंकूश दवरलो. डॅथ ओव्हरींनी पंगड ताबडतोड बॅटींग करपाचो यत्न करता, थंय फुडल्या तीन ओव्हरींनी चेन्नयान फकत 25 धांवड्यो केल्यो. 19वे ओव्हरींत भुवनेश्वर कुमारान बरी बॉलींग केली. ताणें फकत स धांवड्यो दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
