भांगरभूंय | प्रतिनिधी
इंडीयन प्रिमीयर लिगेंतली (आयपीएल) 41वी मॅच येजमान सनरायझर्स हैदराबाद आनी रॉयल चॅलेंजर्स बंगळुरू ह्या पंगडां मदीं हांगाच्या राजीव गांधी आंतरराष्ट्रीय स्टेडियमाचेर जातली.
हैदराबाद ही मॅच जिखून प्ले ऑफाचे आनीक लागसार वचपाचो ताचो यत्न आसतलो. सध्या गुणतकट्यांत पांच जैतां जोडून 10 गुणां सयत तिसरे सुवातेर आसा. दुसरे वटेन बंगळुरू जैत जोडून लिगेंतली आस्त कायम दवरपाक इत्सूक आसतलो. ताणें फकत एकूच जैत जोडलां. फाटल्यो सेगीत स मॅची तो हारला.
दोनूय पंगडां मदीं अजून मेरेन 24 मॅची जाल्यात. हातूंतल्यो 12 हैदराबादान जाल्यार 10 बंगळुरून जिखल्यात. ह्या मैदानाचेर तांचे मदीं आठ मॅची जाल्यात. बंगळुरून फकत दोन जैतां जोडल्यांत. एक मॅच रद्द जाल्ली. अंदूंच्या हंगामांत दोनूय पंगड पयल्या टप्प्यांत बंगळुरूंत खेळिल्ले. त्या वेळार हैदराबादान 287 धांवड्यांचो दोंगर उबारिल्लो. आयचे मॅचींत लेगीत अशाच प्रदर्शनाची आस्त प्रेक्षकांक आसतली. 2023 सावन ह्या मैदानाचेर सुमार णवचे रन रेटीन धांवड्यो आयल्यात.
हैदराबादाची ओपनरांची जोडी सध्या फॉर्मांत आसा. अभिषेक शर्मा आनी ट्रॅव्हिस हेड हाणें जबरदस्त बॅटींग केल्या. हेडान बंगळुरूच्या सगल्या बॉलरां आड किमान 194चे स्ट्रायक रेटीन धांवड्यो केल्यात.फक ल्योकी फर्ग्युसनाक ताका बाद करपाक शक्य जालां.
15 एप्रीलाक ह्या पंगडां मदीं मॅच जाल्ली त्या वेळार टॅव्हिस हेडान णव चवके आनी आठ सक्यांचे मजतीन 41 बॉलांनी 102 धांवड्यांची वादळी खेळी केल्ली आनी अभिषेक शर्मा वांगडा फकत 8.1 ओव्हरींनी 108 धांवड्यांची भागिदारी केल्ली.
अभिषेक लेगीत बंगळुरूच्या बॉलरां आड किमान 142चे स्ट्रायक रेटीन धांवड्यो करता. फकत मोहम्मद सिराज अपवाद आसा. ताच्या आड ताची स्ट्रायक रेट 128 आसा.
ट्रॅव्हिस हेडा उपरांत हॅन्रिक क्लासन हैदराबादाचो येसस्वी बॅट्समन आसा. ताणें अंदूंच्या हंगामांत तीन अर्द शेंकडे आनी सुमार 200चे स्ट्रायक रेटीन 268 धांवड्यो केल्यात. ताका आडावपाक जाय जाल्यार बंगळुरूच्या पंगड वेवस्थापनाक परतून एकदा अल्जारी जोसेफाक खेळोवपा विशीं विचार करचो पडटलो. सुरवातीच्या तीन मॅचींनी ताका खेळयिल्लो. पूण, सध्या पंगडांतल्यान भायर आसा. जोसेफान क्लासेनाक चार डावांनी दोन खेपे बाद केला. जाल्यार क्लासेन ताच्या आड फकत 143चे स्ट्रायक रेटीन धांवड्यो केल्यात. जोसेफाक सोडलो जाल्यार बंगळुरूच्या सगल्या बॉलरां आड क्लासेन 150चे स्ट्रायक रेटीन धांवड्यो केल्यात. सिराजान क्लासेनाक दोन खेपे बाद केला. पूण, क्लासनान ताच्या आड 175चे स्ट्रायक रेटीन धांवड्यो केल्यात.
बंगळुरूचो येसस्वी बॅट्समन विराट कोहलीक हैदराबादाचो फास्ट बॉलर भुवनेश्वर कुमारा आड खेळटना आडखळ जाता. भुवनेश्वरान ताका चार खेपे बाद केला. जाल्यार कोहलीन भुवनेश्वरा आड 144चे स्ट्रायक रेटीन आनी 32चे सरासरीन धांवड्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
